സൗദി അറേബ്യയിലെ അൽ ഖർജിൽ പെട്ടെന്നുണ്ടായേക്കാവുന്ന അപകടസാധ്യത മുന്നിൽക്കണ്ട് സിവിൽ ഡിഫൻസ് ഡയറക്ടറേറ്റ് അടിയന്തര ജാഗ്രതാ നിർദ്ദേശം നൽകി. 'നാഷണൽ പ്ലാറ്റ്‌ഫോം ഫോർ ഏർലി വാണിംഗ്' വഴിയാണ് സുരക്ഷാ സന്ദേശം അയച്ചിരിക്കുന്നത്. ജനങ്ങൾ പരിഭ്രാന്തരാകരുതെന്നും അധികൃതർ നൽകുന്ന ഔദ്യോഗിക നിർദ്ദേശങ്ങൾ കർശനമായി പാലിക്കണമെന്നും സിവിൽ ഡിഫൻസ് അറിയിച്ചു.

സുരക്ഷ ഉറപ്പാക്കുന്നതിനായി താഴെ പറയുന്ന നിർദ്ദേശങ്ങൾ പാലിക്കാൻ അധികൃതർ ആവശ്യപ്പെട്ടു:

• ജനലുകളിൽ നിന്നും ചില്ലുവാതിലുകളിൽ നിന്നും അകന്ന് കെട്ടിടങ്ങൾക്കുള്ളിലോ സുരക്ഷിതമായ മുറികൾക്കുള്ളിലോ ഉടൻ അഭയം തേടുക.
• അപകടസാധ്യത പൂർണ്ണമായും ഒഴിയുന്നതുവരെ പുറത്തിറങ്ങരുത്.
• അപകടസ്ഥലങ്ങളിൽ ഫോട്ടോ എടുക്കാനോ വീഡിയോ പകർത്താനോ കൂട്ടം കൂടുന്നത് ഒഴിവാക്കുക.
• കൂടുതൽ വിവരങ്ങൾക്കായി ഔദ്യോഗിക വാർത്താ സ്രോതസ്സുകളെ മാത്രം ആശ്രയിക്കുക.

അൽ ഖർജ് മേഖലയിൽ താമസിക്കുന്നവരും യാത്രക്കാരും അതീവ ജാഗ്രത പാലിക്കണമെന്നും അടിയന്തര സാഹചര്യങ്ങളിൽ സിവിൽ ഡിഫൻസിന്റെ സഹായം തേടണമെന്നും അധികൃതർ വ്യക്തമാക്കി. മേഖലയിൽ മുൻകരുതൽ നടപടികൾ ശക്തമാക്കിയിട്ടുണ്ട്.