യു.എ.ഇയുടെ ഗതാഗത ചരിത്രത്തിൽ പുതിയൊരു സുവർണ അധ്യായം എഴുതിച്ചേർത്തുകൊണ്ട് ‘ഇത്തിഹാദ് റെയിൽ’ (Etihad Rail) പാസഞ്ചർ ട്രെയിൻ സർവീസിന് ഇന്ന് (ചൊവ്വാഴ്ച) ഔദ്യോഗികമായി തുടക്കമായി. ഫുജൈറ- അബുദാബി റൂട്ടിലാണ് രാജ്യത്തെ ആദ്യ യാത്രാ ട്രെയിൻ കന്നി സർവീസ് നടത്തിയത്. വർഷങ്ങളായുള്ള ജനങ്ങളുടെ കാത്തിരിപ്പിന് വിരാമമിട്ടാണ് എമിറേറ്റുകളെ തമ്മിൽ ബന്ധിപ്പിച്ചുകൊണ്ടുള്ള ഈ സ്വപ്നക്കുതിപ്പ്. ഫുജൈറയിലെ അൽ ഹിലാൽ സിറ്റി സ്റ്റേഷനിൽ നിന്നും അബുദാബിയിലെ മുഹമ്മദ് ബിൻ സായിദ് സിറ്റി സ്റ്റേഷനിലേക്കാണ് ആദ്യ ഘട്ടത്തിൽ ട്രെയിൻ കുതിച്ചുപായാൻ ഒരുങ്ങുന്നത്.

യാത്ര വെറും 105 മിനിറ്റിൽ!

റോഡ് മാർഗ്ഗം മണിക്കൂറുകൾ നീളുന്ന അബുദാബി - ഫുജൈറ യാത്ര ഇനി വെറും 1 മണിക്കൂർ 45 മിനിറ്റ് (105 മിനിറ്റ്) കൊണ്ട് പൂർത്തിയാക്കാം എന്നതാണ് ഇത്തിഹാദ് റെയിലിന്റെ പ്രധാന ആകർഷണം.

• പരമാവധി വേഗത: മണിക്കൂറിൽ 200 കിലോമീറ്റർ
• യാത്രക്കാരുടെ ശേഷി: ഒരു ട്രെയിനിൽ ഒരേസമയം 400 പേർക്ക് സഞ്ചരിക്കാം.

സർവീസ് സമയക്രമം

ആദ്യ ഘട്ടത്തിൽ ഇരുവശങ്ങളിലേക്കുമായി പ്രവൃത്തിദിവസങ്ങളിൽ ദിവസേന മൂന്നു സർവീസുകൾ വീതവും, ശനി, ഞായർ ദിവസങ്ങളിൽ രണ്ടു സർവീസുകൾ വീതവുമായിരിക്കും ഉണ്ടാകുക. റെയിൽവേ സ്റ്റേഷനുകൾ ദിവസവും രാവിലെ 5:00 മുതൽ രാത്രി 11:00 വരെ തുറന്നുപ്രവർത്തിക്കും.

അബുദാബിയിൽ നിന്ന്:

• രാവിലെ 08:19 | ഉച്ചയ്ക്ക് 01:53 | വൈകുന്നേരം 06:39

ഫുജൈറയിൽ നിന്ന്:

• പുലർച്ചെ 05:34 | രാവിലെ 10:59 | വൈകുന്നേരം 05:28

ടിക്കറ്റ് നിരക്കുകളും ക്ലാസുകളും

ഉദ്ഘാടനത്തോടനുബന്ധിച്ച് ടിക്കറ്റ് നിരക്കുകളിൽ വലിയ ഡിസ്കൗണ്ടാണ് കമ്പനി പ്രഖ്യാപിച്ചിരിക്കുന്നത്. ജൂൺ 23 മുതൽ ടിക്കറ്റ് ബുക്കിങ് ആരംഭിച്ചിരുന്നതായും ജൂലൈ 5 വരെയുള്ള ഭൂരിഭാഗം പ്രീമിയം ടിക്കറ്റുകളും ഇതിനകം വിറ്റുതീർന്നതായും അധികൃതർ വ്യക്തമാക്കി.

ടിക്കറ്റ് ബുക്ക് ചെയ്യാൻ: ഇത്തിഹാദ് റെയിൽ മൊബൈൽ ആപ്പ് വഴിയോwww.etihadrail.aeഎന്ന ഔദ്യോഗിക വെബ്‌സൈറ്റ് വഴിയോ ടിക്കറ്റുകൾ സ്വന്തമാക്കാം.

കണക്റ്റിവിറ്റി ബസ് സർവീസ്:

യാത്രക്കാരുടെ സൗകര്യത്തിനായി അബുദാബിയിൽ കേവലം 10 ദിർഹം നിരക്കിൽ ഷട്ടിൽ ബസ് സർവീസും ഏർപ്പെടുത്തിയിട്ടുണ്ട്. ഈ ബസുകൾ റെയിൽവേ സ്റ്റേഷനെ അഡ്നോക് (ADNOC) ഹെഡ്ക്വാർട്ടേഴ്‌സ്, അഡ്നെക് (ADNEC) സെന്റർ, റീം മാൾ തുടങ്ങിയ പ്രധാന കേന്ദ്രങ്ങളുമായി ബന്ധിപ്പിക്കും.

ദുബായ്, ഷാർജ സ്റ്റേഷനുകൾ സെപ്റ്റംബർ 30-ന്

രാജ്യത്തെ 11 പ്രധാന നഗരങ്ങളെയും മേഖലകളെയും ബന്ധിപ്പിക്കുന്ന 900 കിലോമീറ്റർ നീളമുള്ള യാത്രാ ശൃംഖല ഘട്ടങ്ങളായാണ് പൂർണ്ണ സജ്ജമാകുക.

• 2026 സെപ്റ്റംബർ 30: ദുബായ് (ജുമൈറ ഗോൾഫ് എസ്റ്റേറ്റ്സ്), ഷാർജ (അൽ ദൈദ്) സ്റ്റേഷനുകൾ തുറക്കും. അന്നേദിവസം തന്നെ പദ്ധതിയുടെ ഔദ്യോഗിക ഉദ്ഘാടനവും നടക്കും. (അബുദാബി - ദുബായ് യാത്രയ്ക്ക് വെറും 57 മിനിറ്റ് മാത്രം).
• 2026 ഡിസംബർ 30: അൽ ദഫ്റ മേഖലയിലെ സ്റ്റേഷനുകൾ (അൽ സില, അൽ മിർഫ, മദീനത്ത് സായിദ്) തുറക്കും.
• 2027 മാർച്ച് 30: ഷാർജ യൂണിവേഴ്സിറ്റി സിറ്റി സ്റ്റേഷൻ കൂടി തുറക്കുന്നതോടെ പദ്ധതി പൂർണ്ണരൂപത്തിലാകും.

2030-ഓടെ പ്രതിവർഷം 3.6 കോടി യാത്രക്കാരെയാണ് ഇത്തിഹാദ് റെയിൽ ലക്ഷ്യമിടുന്നത്.

അത്യാധുനിക സജ്ജീകരണങ്ങൾ

സ്പാനിഷ് കമ്പനിയായ സി.എ.എഫ് (CAF) രൂപകൽപ്പന ചെയ്ത ആധുനിക സൗകര്യങ്ങളോട് കൂടിയ 13 യാത്രാ ട്രെയിനുകളാണ് നിലവിൽ ഫ്ലീറ്റിലുള്ളത്. ഇതിന് പുറമെ, ആഡംബര ട്രെയിൻ യാത്രകൾക്കായി ഇറ്റാലിയൻ ഹോസ്പിറ്റാലിറ്റി കമ്പനിയായ ആർസെനലെയുമായി (Arsenale) സഹകരിച്ച് 15 കോച്ചുകളുള്ള പ്രത്യേക സർവീസുകളും ഇത്തിഹാദ് റെയിൽ അണിയറയിൽ ഒരുക്കുന്നുണ്ട്.

യു.എ.ഇ നാഷണൽ റെയിൽവേ പ്രോഗ്രാമിന്റെ ഭാഗമായി 199 കോടി ദിർഹം നിക്ഷേപത്തിലാണ് ഈ യാത്രാ പദ്ധതി വികസിപ്പിക്കുന്നത്. ഭാവിയിൽ ഒമാൻ, സൗദി അറേബ്യ ഉൾപ്പെടെയുള്ള മറ്റ് ജി.സി.സി രാജ്യങ്ങളിലേക്ക് നീട്ടാൻ ലക്ഷ്യമിടുന്ന 10,000 കോടി ഡോളറിന്റെ ബൃഹത്തായ ജി.സി.സി റെയിൽ ശൃംഖലയുടെ ഏറ്റവും പ്രധാനപ്പെട്ട ഭാഗം കൂടിയാണ് ഇത്തിഹാദ് റെയിൽ.