തുടർച്ചയായുണ്ടായ ഹൂതി ആക്രമണങ്ങളെ തുടർന്ന് റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിലെ പ്രവർത്തനങ്ങൾ താത്കാലികമായി നിർത്തിവെച്ച നടപടി നീട്ടിയതായി സൗദി സിവിൽ ഏവിയേഷൻ അതോറിറ്റി (GACA) പ്രഖ്യാപിച്ചു. തിങ്കളാഴ്ച ഔദ്യോഗിക 'എക്സ്' (X) അക്കൗണ്ട് വഴിയാണ് അതോറിറ്റി ഇക്കാര്യം അറിയിച്ചത്. വിമാനത്താവളത്തിന്റെ സുരക്ഷയും പ്രവർത്തനക്ഷമതയും പൂർണ്ണമായി ഉറപ്പുവരുത്തുന്നതിനായി ബന്ധപ്പെട്ട അന്വേഷണ സ്ഥാപനങ്ങളുമായി ചേർന്ന് പരിശോധനകൾ പൂർത്തിയാക്കുന്നതിനാണ് ഈ തീരുമാനമെന്നും പ്രസ്താവനയിൽ വ്യക്തമാക്കുന്നു.

കഴിഞ്ഞ ശനിയാഴ്ച വിമാനത്താവളത്തിനുനേരെയുണ്ടായ മിസൈൽ ആക്രമണത്തിൽ 12 പേർ കൊല്ലപ്പെടുകയും 300-ലേറെ പേർക്ക് പരിക്കേൽക്കുകയും ചെയ്ത സാഹചര്യത്തിലാണ് സർവീസുകൾ നിർത്തിവെച്ചത്. തുടർന്നുള്ള ദിവസങ്ങളിലും ആക്രമണങ്ങൾ ആവർത്തിച്ചു. ഞായറാഴ്ച ടെർമിനൽ 4-ൽ പതിച്ച അജ്ഞാത വസ്തു തീപിടുത്തത്തിനിടയാക്കുകയും ഒരു പാകിസ്താൻ പൗരൻ മരിക്കുകയും 11 പേർക്ക് പരിക്കേൽക്കുകയും ചെയ്തിരുന്നു.

അഞ്ച് ദിവസത്തിനിടെ നാലാമത് തവണയാണ് റിയാദ് വിമാനത്താവളം ആക്രമിക്കപ്പെടുന്നത്. ഒരു പതിറ്റാണ്ടിനിടയിലെ ഏറ്റവും വലിയ സുരക്ഷാ ഭീഷണിയെ തുടർന്ന് റിയാദിലേക്കും തിരിച്ചുുമുള്ള നൂറുകണക്കിന് വിമാന സർവീസുകൾ നിലവിൽ റദ്ദാക്കിയിരിക്കുകയാണ്.