വിദ്യാർത്ഥികളുടെ സുരക്ഷയും കാര്യക്ഷമമായ ഗതാഗത സംവിധാനവും ഉറപ്പാക്കുന്നതിന്റെ ഭാഗമായി ഇന്ത്യൻ സ്‌കൂൾ ബഹ്‌‌റൈൻ സൗജന്യ തത്സമയ സ്കൂൾ ബസ് ട്രാക്കിംഗ് സംവിധാനം അവതരിപ്പിച്ചു. 'ഡി.സി പേരന്റ് ആപ്പ്' (DC Parent App) വഴിയാണ് ഈ സേവനം ലഭ്യമാക്കുന്നത്. ഒക്ടോബർ 1 മുതൽ റിഫ കാമ്പസിൽ പ്രാഥമികമായി നടപ്പിലാക്കിയ ഈ സംവിധാനം ഉടൻ തന്നെ ഈസ ടൗൺ കാമ്പസിലേക്കും വ്യാപിപ്പിക്കും. യാതൊരുവിധ അധിക സബ്‌സ്‌ക്രിപ്‌ഷനോ പ്രവർത്തന ഫീസോ ഇല്ലാതെ സൗജന്യമായാണ് ഈ ആപ്പ് സേവനം നൽകുന്നത്.

പുതിയ ആപ്പിലൂടെ രാവിലെയും ഉച്ചയ്ക്കും ബസിന്റെ തത്സമയ സ്ഥാനവും യാത്രാ പുരോഗതിയും നിരീക്ഷിക്കാൻ രക്ഷിതാക്കൾക്ക് സാധിക്കും. ഇത് ബസ് സ്റ്റോപ്പുകളിലെ അനാവശ്യ കാത്തിരിപ്പ് ഒഴിവാക്കാൻ സഹായിക്കും. ഇന്ത്യൻ സ്‌കൂൾ ബഹ്‌റൈന്റെ ഡിജിറ്റൽ പരിവർത്തന പദ്ധതികളുടെ ഭാഗമായാണ് ഈ സംവിധാനമെന്നും, സ്കൂൾ ഗതാഗത സംവിധാനത്തെ കൂടുതൽ സുതാര്യവും സൗകര്യപ്രദവുമാക്കാൻ ഇത് സഹായിക്കുമെന്നും സ്‌കൂൾ ചെയർമാൻ അഡ്വ. ബിനു മണ്ണിൽ വർഗ്ഗീസ് പറഞ്ഞു. ഐ.ഓ.എസ് ആപ്പ് സ്റ്റോർ, ഗൂഗിൾ പ്ലേ സ്റ്റോർ എന്നിവ വഴി ആപ്പിന്റെ പുതിയ പതിപ്പ് ഡൗൺലോഡ് ചെയ്ത് രക്ഷിതാക്കൾക്ക് ഈ സേവനം ഉപയോഗിക്കാം.