ഇൻഡൊനീഷ്യയിലെ ഫ്ലോറസ് ദ്വീപിലുണ്ടായ ശക്തമായ ഭൂചലനത്തിൽ മരിച്ചവരുടെ എണ്ണം 38 ആയി ഉയർന്നു. റിക്ടർ സ്കെയിലിൽ 7.7 തീവ്രത രേഖപ്പെടുത്തിയ ഭൂചലനത്തിൽ തകർന്ന കെട്ടിടങ്ങൾക്കിടയിൽ കുടുങ്ങിക്കിടക്കുന്നവരെ പുറത്തെടുക്കാനുള്ള രക്ഷാപ്രവർത്തനം തുടരുകയാണ്. മരണസംഖ്യ ഇനിയും വർധിക്കാൻ സാധ്യതയുണ്ടെന്ന് ദുരന്തനിവാരണ ഏജൻസി (BNPB) അറിയിച്ചു.

മൊമേറെ തുറമുഖത്ത് യാത്രക്കാരുടെ മേൽ കെട്ടിടാവശിഷ്ടങ്ങൾ വീഴുകയും ചിലർ കടലിലേക്ക് തെറിച്ചു വീഴുകയും ചെയ്തിട്ടുണ്ടെന്ന് ഈസ്റ്റ് നുസ തെങ്ങര ഗവർണർ വ്യക്തമാക്കി. സിക്ക, മാംഗരൈ, ഈസ്റ്റ് മാംഗരൈ എന്നീ പ്രവിശ്യകളിലാണ് ഏറ്റവും കൂടുതൽ നാശനഷ്ടങ്ങൾ റിപ്പോർട്ട് ചെയ്തിരിക്കുന്നത്.

ഭൂചലനത്തെത്തുടർന്ന് നൽകിയിരുന്ന സുനാമി മുന്നറിയിപ്പ് മൂന്ന് മണിക്കൂറിന് ശേഷം പിൻവലിച്ചെങ്കിലും രണ്ടായിരത്തോളം പേരെ ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിച്ചു. തീരപ്രദേശങ്ങളിൽ ജനങ്ങൾ അതീവ ജാഗ്രത പാലിക്കണമെന്ന് അധികൃതർ നിർദേശം നൽകിയിട്ടുണ്ട്.