പശ്ചിമേഷ്യൻ യുദ്ധം മൂന്നാം ആഴ്ചയിലേക്ക് കടക്കുന്നതിനിടെ ഇറാൻ സൈന്യത്തിന് കനത്ത പ്രഹരം. ഇറാനിയൻ റെവല്യൂഷണറി ഗാർഡ് കോർപ്‌സ് (IRGC) വക്താവ് ബ്രിഗേഡിയർ ജനറൽ അലി മുഹമ്മദ് നൈനി ഇസ്രായേൽ വ്യോമാക്രമണത്തിൽ കൊല്ലപ്പെട്ടു. അമേരിക്കയ്ക്കും ഇസ്രായേലിനും വലിയൊരു 'അത്ഭുതം' കാത്തിരിക്കുന്നുണ്ടെന്ന് അദ്ദേഹം മുന്നറിയിപ്പ് നൽകി മണിക്കൂറുകൾക്കുള്ളിലായിരുന്നു ആക്രമണം. നൈനിയുടെ മരണം ഇറാൻ ഔദ്യോഗികമായി സ്ഥിരീകരിച്ചു. "അമേരിക്കൻ-സയണിസ്റ്റ് സഖ്യത്തിന്റെ ഭീരുത്വപരമായ ഭീകരാക്രമണമാണിതെന്ന്" ഇറാൻ ആരോപിച്ചു.

ഇറാന്റെ മിസൈൽ നിർമ്മാണവും യുറേനിയം സമ്പുഷ്ടീകരണവും തകർത്തെന്ന് ഇസ്രായേൽ പ്രധാനമന്ത്രി ബെന്യാമിൻ നെതന്യാഹു അവകാശപ്പെട്ടതിനെ നൈനി നേരത്തെ പരിഹസിച്ചിരുന്നു. ഇറാന്റെ മിസൈൽ ഉൽപ്പാദനം തടസ്സമില്ലാതെ തുടരുന്നുണ്ടെന്നും മതിയായ ശേഖരം കൈവശമുണ്ടെന്നും അദ്ദേഹം വ്യക്തമാക്കിയിരുന്നു. കൂടാതെ, ഇറാന്റെ നാവികസേനയെ തകർത്തെന്ന് അവകാശപ്പെട്ട മുൻ അമേരിക്കൻ പ്രസിഡന്റ് ഡൊണാൾഡ് ട്രംപിനെ വെല്ലുവിളിച്ച നൈനി, ധൈര്യമുണ്ടെങ്കിൽ പേർഷ്യൻ ഗൾഫിലേക്ക് കപ്പലുകൾ അയക്കാൻ വാഷിംഗ്ടണിനോട് ആവശ്യപ്പെട്ടിരുന്നു.

അതേസമയം, ഇറാന്റെ സൈനിക പ്രഹരശേഷി തകർത്തതായി നെതന്യാഹു ആവർത്തിച്ചു. 20 ദിവസത്തെ യുദ്ധത്തിന് ശേഷം ഇറാന് ഇന്ന് യുറേനിയം സമ്പുഷ്ടമാക്കാനോ ബാലിസ്റ്റിക് മിസൈലുകൾ നിർമ്മിക്കാനോ ഉള്ള ശേഷിയില്ലെന്ന് അദ്ദേഹം പറഞ്ഞു. ഇറാന്റെ സൈനിക ശേഷികളെ തകർത്ത് അവരെ പൊടിയും ചാരവുമാക്കുമെന്നും ഇറാൻ മുൻപത്തേക്കാൾ ദുർബലമാണെന്നും നെതന്യാഹു അവകാശപ്പെട്ടു. ഉന്നത സൈനിക ഉദ്യോഗസ്ഥൻ കൊല്ലപ്പെട്ടതോടെ മേഖലയിൽ സംഘർഷം കൂടുതൽ രൂക്ഷമാകാനാണ് സാധ്യത.