ഇറാനെതിരെയുള്ള ഇസ്രായേൽ-അമേരിക്കൻ സംയുക്ത സൈനിക നടപടിയുടെ രണ്ടാം ദിനമായ ഞായറാഴ്ച വടക്കൻ ടെഹ്‌റാനിലെ ഗാന്ധി ആശുപത്രിയിൽ വ്യോമാക്രമണം നടന്നതായി റോയിട്ടേഴ്‌സ് റിപ്പോർട്ട് ചെയ്തു. ആക്രമണത്തിൽ ആശുപത്രിക്ക് കാര്യമായ നാശനഷ്ടങ്ങൾ സംഭവിച്ചതായും പരിഭ്രാന്തരായ രോഗികളെയും ജീവനക്കാരെയും സംഭവസ്ഥലത്ത് നിന്ന് ഉടൻ ഒഴിപ്പിച്ചതായും ദൃക്‌സാക്ഷികൾ വെളിപ്പെടുത്തി. ആശുപത്രിയുടെ ഉള്ളിൽ നിന്നുള്ള ദൃശ്യങ്ങളിൽ അവശിഷ്ടങ്ങൾ ചിതറിക്കിടക്കുന്നതും കടുത്ത പുക ഉയരുന്നതും കാണാം.

"സയണിസ്റ്റ്-അമേരിക്കൻ" വ്യോമാക്രമണമാണ് നടന്നതെന്ന് ഇറാനിയൻ വാർത്താ ഏജൻസിയായ ISNA കുറ്റപ്പെടുത്തി. അതേസമയം, ടെഹ്‌റാനിലെ സർക്കാർ കേന്ദ്രങ്ങളിലും മിസൈൽ കമാൻഡ് സെന്ററുകളിലും ഒരേസമയം 100-ഓളം ഫൈറ്റർ ജെറ്റുകൾ ഉപയോഗിച്ച് ആക്രമണം നടത്തിയതായി ഇസ്രായേൽ പ്രതിരോധ സേന (IDF) അറിയിച്ചു. ഇറാൻ തലസ്ഥാനത്തിന്റെ മധ്യഭാഗങ്ങളിലേക്ക് ആക്രമണം വ്യാപിപ്പിക്കുകയാണെന്നും ഇസ്രായേൽ പ്രഖ്യാപിച്ചു.

ഇതിനിടെ, ആയത്തുള്ള അലി ഖമനേയിയുടെ മരണത്തെത്തുടർന്ന് രാജ്യഭരണം താൽക്കാലികമായി നിയന്ത്രിക്കാൻ മൂന്നംഗ നേതൃത്വ കൗൺസിലിനെ ഇറാൻ നിയോഗിച്ചു. പ്രസിഡന്റ് മസൂദ് പെസെഷ്‌കിയാൻ, നീതിന്യായ വിഭാഗം മേധാവി ഘോലാം ഹുസൈൻ മൊഹ്‌സെനി എജെഹെ, മുതിർന്ന പുരോഹിതൻ ആയത്തുള്ള അലി റെസ അറാഫി എന്നിവരടങ്ങിയ കൗൺസിൽ ചുമതലയേറ്റതായി പെസെഷ്‌കിയാൻ സ്ഥിരീകരിച്ചു. പുതിയ പരമോന്നത നേതാവിനെ തിരഞ്ഞെടുക്കുന്നത് വരെ ഈ കൗൺസിലിനായിരിക്കും ഭരണച്ചുമതല.

ഇസ്രായേൽ ആക്രമണത്തിന് തിരിച്ചടിയായി സൗദി അറേബ്യ, ദുബായ് എന്നിവിടങ്ങളിലെ അമേരിക്കൻ സൈനിക താവളങ്ങൾ ലക്ഷ്യമാക്കി ഇറാൻ മിസൈൽ-ഡ്രോൺ ആക്രമണങ്ങൾ നടത്തിയിട്ടുണ്ട്. മേഖലയിൽ യുദ്ധം അതിതീവ്രമായി തുടരുന്നത് ആഗോളതലത്തിൽ വലിയ ആശങ്കയുയർത്തുന്നു.