സൗദി അറേബ്യയിലെ ഖൈസൂമ വിമാനത്താവളത്തിൽ (AQI) നിന്നുള്ള ജസീറ എയർവേയ്‌സിന്റെ കന്നി വിമാന സർവീസ് ഇന്ന് ആരംഭിക്കും. ഈജിപ്തിലെ അലക്‌സാണ്ട്രിയയിലേക്കുള്ള (HBE) ആദ്യ വിമാനം ഇന്ന് രാത്രി 10:45-ന് ഖൈസൂമയിൽ നിന്ന് പുറപ്പെടുമെന്ന് അധികൃതർ അറിയിച്ചു. കുവൈത്തിൽ നിന്നുള്ള യാത്രികർക്ക് കരമാർഗ്ഗം സൗദി അതിർത്തി കടന്ന് ഈ സേവനം പ്രയോജനപ്പെടുത്താം.

സാധുവായ കുവൈത്ത് റെസിഡൻസി പെർമിറ്റ് കൈവശമുള്ള യാത്രക്കാർക്ക് സൗദി അതിർത്തി കടക്കുമ്പോൾ ട്രാൻസിറ്റ് വിസ അനുവദിക്കും. എന്നാൽ കുവൈത്ത് സന്ദർശന വിസയിലുള്ളവർ യാത്രയ്ക്കായി മുൻകൂട്ടി സൗദി വിസ കരസ്ഥമാക്കേണ്ടതുണ്ട്. കുവൈത്തിൽ നിന്ന് കരമാർഗ്ഗം ഖൈസൂമയിലെത്തി അവിടെനിന്ന് വിമാനത്തിൽ അലക്‌സാണ്ട്രിയയിലേക്ക് പോകാനാണ് സൗകര്യം ഒരുക്കിയിരിക്കുന്നത്. തിരികെ അലക്‌സാണ്ട്രിയയിൽ നിന്ന് ഖൈസൂമയിൽ എത്തുന്നവരും കുവൈത്തിലേക്ക് കരമാർഗ്ഗമാണ് മടങ്ങേണ്ടത്. ഇത്തരം യാത്രക്കാർക്ക് സാധുവായ കുവൈത്ത് താമസ വിസയോ സന്ദർശന വിസയോ ഉണ്ടായിരിക്കണം.

മേഖലയിലെ യാത്രാ തിരക്ക് പരിഗണിച്ച് വരും ദിവസങ്ങളിൽ കൂടുതൽ സർവീസുകൾ ഖൈസൂമയിൽ നിന്ന് പ്രഖ്യാപിക്കുമെന്ന് ജസീറ എയർവേയ്‌സ് വ്യക്തമാക്കി. ജസീറ എയർവേയ്‌സിന്റെ വെബ്‌സൈറ്റ് വഴിയോ മൊബൈൽ ആപ്പ് വഴിയോ യാത്രക്കാർക്ക് ടിക്കറ്റുകൾ ബുക്ക് ചെയ്യാം. കുവൈത്ത് അതിർത്തിയോട് ചേർന്നുള്ള വിമാനത്താവളമായതിനാൽ വടക്കൻ സൗദിയിലെയും കുവൈത്തിലെയും പ്രവാസികൾക്ക് ഈ പുതിയ സർവീസ് വലിയ ആശ്വാസമാകും.