പശ്ചിമേഷ്യയിലെ നിലവിലെ സംഘർഷ സാഹചര്യങ്ങൾ കണക്കിലെടുത്ത് കീം (KEAM 2026) പ്രവേശന പരീക്ഷയെഴുതുന്ന ഗൾഫ് മേഖലയിലെ വിദ്യാർഥികൾക്ക് പരീക്ഷാകേന്ദ്രം മാറ്റാൻ വൺ-ടൈം സൗകര്യം അനുവദിച്ച് പ്രവേശന പരീക്ഷാ കമ്മീഷണർ ഉത്തരവിട്ടു. യാത്രാതടസ്സങ്ങൾ മൂലം ബുദ്ധിമുട്ടുന്ന വിദ്യാർഥികൾക്ക് വലിയ ആശ്വാസമാകുന്നതാണ് ഈ തീരുമാനം.

യുഎഇ (ഷാർജ) പരീക്ഷാകേന്ദ്രമായി തിരഞ്ഞെടുത്ത നിലവിൽ കേരളത്തിലുള്ള വിദ്യാർഥികൾക്ക് സംസ്ഥാനത്തെ ഏതെങ്കിലും കേന്ദ്രത്തിലേക്ക് പരീക്ഷ മാറ്റാം. അതുപോലെ കേരളത്തിൽ കേന്ദ്രം തിരഞ്ഞെടുക്കുകയും നിലവിൽ ഗൾഫ് രാജ്യങ്ങളിൽ തുടരുകയും ചെയ്യുന്നവർക്ക് പരീക്ഷാകേന്ദ്രം അങ്ങോട്ടേക്ക് മാറ്റാനും അവസരമുണ്ട്. യുഎഇ കേന്ദ്രമായി ലഭിച്ചവർക്ക് പകരമായി കുവൈത്തോ ബഹ്‌റൈനോ പുതിയ പരീക്ഷാകേന്ദ്രമായി തിരഞ്ഞെടുക്കാവുന്നതാണ്.

പരീക്ഷാകേന്ദ്രങ്ങൾ മാറ്റാൻ അനുവാദം നൽകിയ സാഹചര്യത്തിൽ കീം അഡ്മിറ്റ് കാർഡ് വിതരണം ചെയ്യുന്ന തീയതിയിലും മാറ്റം വരുത്തിയിട്ടുണ്ട്. ഏപ്രിൽ ഒന്നിന് ലഭിക്കേണ്ടിയിരുന്ന ഹാൾ ടിക്കറ്റുകൾ ഏപ്രിൽ എട്ടിന് മാത്രമേ ഔദ്യോഗിക വെബ്സൈറ്റിൽ ലഭ്യമാകൂ. അർഹരായ വിദ്യാർഥികൾ പ്രവേശന പരീക്ഷാ കമ്മീഷണറുടെ ഔദ്യോഗിക വെബ്സൈറ്റായ cee.kerala.gov.in സന്ദർശിച്ച് 'KEAM 2026 - Candidate Portal' വഴി ലോഗിൻ ചെയ്ത് 'Change Centre' എന്ന ഓപ്ഷൻ തിരഞ്ഞെടുത്ത് പുതിയ കേന്ദ്രത്തിനായി അപേക്ഷിക്കണം. നിശ്ചിത സമയപരിധി കഴിഞ്ഞാൽ പിന്നീട് യാതൊരു കാരണവശാലും അപേക്ഷകൾ സ്വീകരിക്കില്ലെന്ന് അധികൃതർ വ്യക്തമാക്കി.