ഉത്തരകൊറിയയിൽ നടന്ന 15-ാമത് സുപ്രീം പീപ്പിൾസ് അസംബ്ലി തെരഞ്ഞെടുപ്പിൽ കിം ജോങ് ഉന്നിന്റെ നേതൃത്വത്തിലുള്ള ഭരണകൂടത്തിന് വൻ വിജയം. പോൾ ചെയ്ത വോട്ടുകളിൽ 99.97% വോട്ടും എല്ലാ സീറ്റുകളും നേടിയാണ് കിം ജോങ് ഉൻ അധികാരം ഉറപ്പിച്ചത്. എന്നാൽ, രാജ്യം രൂപീകൃതമായതിന് ശേഷം ആദ്യമായി സ്ഥാനാർത്ഥികൾക്കെതിരെ എതിർ വോട്ടുകൾ രേഖപ്പെടുത്തി എന്ന പ്രത്യേകതയും ഇത്തവണത്തെ തെരഞ്ഞെടുപ്പിനുണ്ട്. രാജ്യത്തെ ഔദ്യോഗിക മാധ്യമമായ കെ.സി.എൻ.എ (KCNA) ആണ് ഈ വിവരങ്ങൾ പുറത്തുവിട്ടത്.

മാർച്ച് 15-ന് നടന്ന വോട്ടെടുപ്പിൽ രജിസ്റ്റർ ചെയ്ത വോട്ടർമാരിൽ 99.99% പേരും പങ്കെടുത്തു. വിദേശത്തോ കടലിലോ ജോലി ചെയ്യുന്ന 0.0037% പേർക്ക് മാത്രമാണ് വോട്ട് ചെയ്യാൻ എത്താതിരുന്നത്. വോട്ട് ചെയ്തവരിൽ 99.93% പേർ ഔദ്യോഗിക സ്ഥാനാർത്ഥികളെ പിന്തുണച്ചപ്പോൾ, 0.07% പേർ എതിർത്ത് വോട്ട് രേഖപ്പെടുത്തി. 1957-ന് ശേഷം ഇതാദ്യമായാണ് ഉത്തരകൊറിയൻ തെരഞ്ഞെടുപ്പിൽ വിയോജിപ്പുള്ള വോട്ടുകൾ രേഖപ്പെടുത്തിയതായി സർക്കാർ മാധ്യമങ്ങൾ തന്നെ സമ്മതിക്കുന്നത്. ഓരോ നിയോജകമണ്ഡലത്തിലും ഒരു സ്ഥാനാർത്ഥി മാത്രമുള്ളതിനാൽ അന്താരാഷ്ട്ര നിരീക്ഷകർ ഈ തെരഞ്ഞെടുപ്പിനെ 'ഷോ ഇലക്ഷൻ' എന്നാണ് വിശേഷിപ്പിക്കുന്നത്.

തൊഴിലാളികൾ, കർഷകർ, സൈനികർ എന്നിവരുൾപ്പെടെ 687 പ്രതിനിധികളെയാണ് അസംബ്ലിയിലേക്ക് തെരഞ്ഞെടുത്തത്. പശ്ചിമേഷ്യൻ സംഘർഷങ്ങൾക്കിടയിൽ അമേരിക്കയും ദക്ഷിണ കൊറിയയും സംയുക്ത സൈനികാഭ്യാസം നടത്തുന്ന പശ്ചാത്തലത്തിലാണ് ഉത്തരകൊറിയയിൽ തെരഞ്ഞെടുപ്പ് നടന്നത്. ഇതിനിടെ ജപ്പാൻ കടലിലേക്ക് 10-ലധികം ബാലിസ്റ്റിക് മിസൈലുകൾ വിക്ഷേപിച്ചും റോക്കറ്റ് ലോഞ്ചർ പരീക്ഷണം നടത്തിയും ഉത്തരകൊറിയ തങ്ങളുടെ കരുത്ത് പ്രകടിപ്പിച്ചിരുന്നു. കിമ്മിനെതിരെ വോട്ട് ചെയ്ത ആ 0.07% പേർ ആരാണെന്ന ചർച്ചകൾ ഇപ്പോൾ അന്താരാഷ്ട്ര തലത്തിൽ സജീവമാണ്.