വിശുദ്ധ റമദാനിലെ അവസാന പത്ത് ദിനങ്ങളിൽ ഉംറ തീർത്ഥാടകരുടെയും സന്ദർശകരുടെയും വർധിച്ച തിരക്ക് കണക്കിലെടുത്ത് ഹറമൈൻ അതിവേഗ ട്രെയിൻ സർവീസുകൾ വർധിപ്പിക്കാൻ സൗദി റെയിൽവേ (SAR) തീരുമാനിച്ചു. ഈ സീസണിൽ പ്രതിദിന സർവീസുകളുടെ എണ്ണം 140-ലധികമായി ഉയർത്താനാണ് അധികൃതർ ലക്ഷ്യമിടുന്നത്. റമദാൻ മാസത്തിലുടനീളം ആകെ 3,600 സർവീസുകളിലായി 17 ലക്ഷത്തിലധികം സീറ്റുകളാണ് തീർത്ഥാടകർക്കായി ഒരുക്കിയിരിക്കുന്നത്.

മക്കയെയും മദീനയെയും ജിദ്ദ, കിങ് അബ്ദുല്ല ഇക്കണോമിക് സിറ്റി എന്നിവയുമായി ബന്ധിപ്പിക്കുന്ന ഹറമൈൻ ട്രെയിൻ മേഖലയിലെ ഏറ്റവും പ്രധാനപ്പെട്ട ഗതാഗത സംവിധാനമാണ്. മണിക്കൂറിൽ 300 കിലോമീറ്റർ വേഗതയിൽ സഞ്ചരിക്കുന്ന ഈ അതിവേഗ ട്രെയിൻ ഇരു പുണ്യനഗരങ്ങൾക്കുമിടയിലുള്ള യാത്രാ സമയം വെറും രണ്ട് മണിക്കൂറായി കുറയ്ക്കുന്നു. തിരക്കേറിയ സമയങ്ങളിൽ യാത്രക്കാർക്ക് കാത്തിരിപ്പ് ഒഴിവാക്കി സുഗമമായി യാത്ര ചെയ്യാനുള്ള സൗകര്യം പുതിയ പ്രവർത്തന പദ്ധതി ഉറപ്പാക്കും.

സുരക്ഷാ മാനദണ്ഡങ്ങളിലും സേവന ഗുണനിലവാരത്തിലും വിട്ടുവീഴ്ചയില്ലാതെ, 24 മണിക്കൂറും പ്രവർത്തിക്കുന്ന ഫീൽഡ് ടീമുകളുടെ മേൽനോട്ടത്തിലാണ് സർവീസുകൾ ക്രമീകരിച്ചിരിക്കുന്നത്. സൗദി വിഷൻ 2030-ന്റെ ഭാഗമായി തീർത്ഥാടകർക്ക് അത്യാധുനികവും വിശ്വസനീയവുമായ യാത്രാസൗകര്യം ഒരുക്കുക എന്ന ലക്ഷ്യത്തോടെയാണ് ഈ നീക്കം. റെയിൽവേ സ്റ്റേഷനുകളിൽ അന്താരാഷ്ട്ര നിലവാരത്തിലുള്ള സേവനങ്ങളും യാത്രക്കാർക്കായി സജ്ജമാക്കിയിട്ടുണ്ടെന്ന് സൗദി റെയിൽവേ വ്യക്തമാക്കി.