ഈദുൽ ഫിത്വർ പ്രമാണിച്ച് റിയാദ് നഗരത്തിലെ താമസക്കാർക്കും സന്ദർശകർക്കും സുഗമമായ യാത്ര ഉറപ്പാക്കുന്നതിനായി പൊതുഗതാഗത സേവനങ്ങളുടെ പുതിയ സമയക്രമം റോയൽ കമ്മീഷൻ ഫോർ റിയാദ് സിറ്റി പ്രഖ്യാപിച്ചു. പെരുന്നാൾ അവധി ദിവസങ്ങളിലെ തിരക്ക് കണക്കിലെടുത്താണ് മെട്രോ, ബസ് സർവീസുകളുടെ സമയം പുനഃക്രമീകരിച്ചിരിക്കുന്നത്.

പുതുക്കിയ സമയക്രമം

• റിയാദ് മെട്രോ: മാർച്ച് 20 മുതൽ 23 വരെ രാവിലെ 11:00 മണി മുതൽ രാത്രി 12:00 മണി വരെ സർവീസ് നടത്തും.
• റിയാദ് ബസ് സർവീസ്: മാർച്ച് 20-ന് രാവിലെ 6:30 മുതൽ രാത്രി 12:00 വരെയും, മാർച്ച് 21 മുതൽ 23 വരെ പുലർച്ചെ 5:00 മുതൽ രാത്രി 12:00 വരെയുമാണ് സർവീസ്.
• ബസ് ഓൺ ഡിമാൻഡ്: മാർച്ച് 20 മുതൽ 23 വരെ രാവിലെ 10:30 മുതൽ രാത്രി 12:30 വരെയും ഈ സേവനം ലഭ്യമായിരിക്കും.

അവധി ദിനങ്ങളിൽ നഗരത്തിലെ വിവിധ കേന്ദ്രങ്ങൾ സന്ദർശിക്കുന്നവർക്ക് യാത്രാക്ലേശം ഒഴിവാക്കാൻ ഈ പുതിയ ക്രമീകരണം സഹായിക്കുമെന്ന് അധികൃതർ വ്യക്തമാക്കി. പൊതുഗതാഗത സംവിധാനങ്ങൾ പരമാവധി പ്രയോജനപ്പെടുത്തി നഗരത്തിലെ ഗതാഗതക്കുരുക്ക് കുറയ്ക്കാൻ യാത്രക്കാർ സഹകരിക്കണമെന്നും റോയൽ കമ്മീഷൻ അഭ്യർത്ഥിച്ചു.