യുഎഇയുടെ തലസ്ഥാനമായ അബുദാബിയിലുണ്ടായ മിസൈലാക്രമണത്തിൽ ഒരു ഇന്ത്യക്കാരൻ ഉൾപ്പെടെ രണ്ട് പേർ കൊല്ലപ്പെട്ടു. പാകിസ്താൻ സ്വദേശിയാണ് മരിച്ച രണ്ടാമത്തെയാൾ. ആക്രമണത്തിൽ പരിക്കേറ്റ മൂന്ന് പേരിൽ ഒരാളും ഇന്ത്യൻ പൗരനാണെന്ന് അബുദാബി മീഡിയ ഓഫീസ് സ്ഥിരീകരിച്ചു. ജോർദാൻ, യുഎഇ സ്വദേശികൾക്കാണ് പരിക്കേറ്റ മറ്റുള്ളവർ. അബുദാബിയിലെ സ്വൈഹാൻ സ്ട്രീറ്റിലാണ് (Sweihan Street) അതിശക്തമായ ഈ ആക്രമണം നടന്നത്.

മേഖലയിൽ നിന്നുള്ള ബാലിസ്റ്റിക് മിസൈൽ ആക്രമണത്തെ യുഎഇ പ്രതിരോധ സേന ആകാശത്തുവെച്ച് തന്നെ തകർത്തിരുന്നു. എന്നാൽ തകർക്കപ്പെട്ട മിസൈലിന്റെ അവശിഷ്ടങ്ങൾ ജനവാസ മേഖലയിൽ പതിച്ചതാണ് ദാരുണമായ മരണങ്ങൾക്ക് കാരണമായത്. മിസൈൽ അവശിഷ്ടങ്ങൾ വീണതിനെത്തുടർന്ന് പ്രദേശത്ത് പാർക്ക് ചെയ്തിരുന്ന നിരവധി വാഹനങ്ങൾക്കും കെട്ടിടങ്ങൾക്കും നാശനഷ്ടങ്ങൾ സംഭവിച്ചിട്ടുണ്ട്. ഇതോടെ യുഎഇയിൽ സമീപകാലത്തുണ്ടായ വിവിധ ആക്രമണങ്ങളിൽ മരിച്ചവരുടെ എണ്ണം 11 ആയി ഉയർന്നു.

സംഭവത്തെത്തുടർന്ന് അബുദാബിയിലും പരിസര പ്രദേശങ്ങളിലും സുരക്ഷാ ജാഗ്രത ശക്തമാക്കി. അപ്രതീക്ഷിതമായി ഉണ്ടാകുന്ന ഇത്തരം സാഹചര്യങ്ങളിൽ പൊതുജനങ്ങൾ അതീവ ജാഗ്രത പാലിക്കണമെന്നും ഔദ്യോഗിക അറിയിപ്പുകൾ കൃത്യമായി പിന്തുടരണമെന്നും അധികൃതർ നിർദ്ദേശിച്ചു. പരിക്കേറ്റവർക്ക് അടിയന്തര ചികിത്സ ലഭ്യമാക്കി വരികയാണ്. കൊല്ലപ്പെട്ട ഇന്ത്യക്കാരന്റെ വിവരങ്ങൾ ലഭ്യമാക്കാൻ ഇന്ത്യൻ എംബസി അധികൃതരുമായി ബന്ധപ്പെട്ടു വരികയാണെന്ന് റിപ്പോർട്ടുകൾ സൂചിപ്പിക്കുന്നു.