ബഹ്‌റൈനിലെ മുഹറഖ് ഗവർണറേറ്റിലെ അടിസ്ഥാന സൗകര്യങ്ങൾ പൂർണ്ണമായും ആധുനികവൽക്കരിക്കുന്നതിനായി ദശലക്ഷക്കണക്കിന് ബഹ്‌റൈനി ദിനാർ ചെലവിൽ നടപ്പിലാക്കുന്ന വൻകിട പദ്ധതികളുടെ വിശദാംശങ്ങൾ പൊതുമരാമത്ത് മന്ത്രി ഇബ്രാഹിം അൽ ഹവാജ് പുറത്തുവിട്ടു. റോഡുകൾ, പാലങ്ങൾ, അന്താരാഷ്ട്ര വിമാനത്താവളത്തിലേക്കുള്ള പുതിയ പ്രവേശന കവാടങ്ങൾ, മലിനജല ശുദ്ധീകരണ ശൃംഖലകൾ എന്നിവയുൾപ്പെടെ മുഹറഖിനെ അത്യാധുനിക നഗരമാക്കി മാറ്റുന്നതിനുള്ള വിപുലമായ പദ്ധതികളാണ് മന്ത്രാലയം വിഭാവനം ചെയ്തിരിക്കുന്നത്. പാർലമെന്റ് അംഗം (എം.പി) ഖാലിദ് ബു അനഖിന്റെ ചോദ്യത്തിന് മറുപടി നൽകവെയാണ് മന്ത്രി വികസനരേഖ വ്യക്തമാക്കിയത്.

മുഹറഖിന്റെ സാംസ്കാരികവും ചരിത്രപരവുമായ തനിമ നിലനിർത്തിക്കൊണ്ട് ചരിത്രപ്രധാനമായ സ്ഥലങ്ങളിലേക്കുള്ള റോഡുകൾ വികസിപ്പിക്കുന്ന ശൈഖ് അബ്ദുള്ള അവന്യൂ, ശൈഖ് ഈസ അവന്യൂ പദ്ധതികളുടെ 90 ശതമാനം ജോലികളും ഇതിനകം പൂർത്തിയായിക്കഴിഞ്ഞു. കൂടാതെ ചരിത്രപ്രസിദ്ധമായ വ്യാപാര കേന്ദ്രമായ ശൈഖ് ഹമദ് അവന്യൂ വികസിപ്പിക്കുന്നതിലൂടെ വിപണികളിലേക്കുള്ള പ്രവേശനം സുഗമമാക്കാനും പദ്ധതിയുണ്ട്. 2006 മുതൽ 2023 വരെയുള്ള കാലയളവിൽ മാത്രം 60 ദശലക്ഷത്തിലധികം ദിനാർ ചെലവിട്ട് 27 റോഡ് പദ്ധതികളാണ് മുഹറഖിൽ മന്ത്രാലയം വിജയകരമായി പൂർത്തിയാക്കിയത്.

മുഹറഖിന്റെ വികസന ചരിത്രത്തിലെ നാഴികക്കല്ലാകാൻ പോകുന്ന നാലാമത്തെ മുഹറഖ് പാലത്തിന്റെ നിർമ്മാണം നിലവിൽ ടെണ്ടർ ഘട്ടത്തിലാണ്. മുഹറഖിനെ വടക്ക് ഭാഗത്ത് നിന്ന് തലസ്ഥാനമായ മനാമയുമായി ബന്ധിപ്പിക്കുന്ന ഈ പുതിയ പാലം അഞ്ച് വരി പാതകളോട് കൂടിയതാണ്. അൽ സായ, ബുസൈതീൻ, അൽ ദൈർ, സമഹീജ് എന്നീ പ്രദേശങ്ങളെ പരസ്പരം ബന്ധിപ്പിക്കുന്ന ഈ കടൽപ്പാലം, കടൽനിരപ്പിൽ നിന്ന് 11 മീറ്റർ ഉയരത്തിലായിരിക്കും നിർമ്മിക്കുക. ഒരു വലിയ തൂക്കുപാലമായി നിർമ്മിക്കുന്ന ഇത് ബഹ്‌റൈനിലെ തന്നെ മികച്ച ഒരു വാസ്തുവിദ്യാ വിസ്മയമായിരിക്കും.

ബഹ്‌റൈൻ അന്താരാഷ്ട്ര വിമാനത്താവളത്തിലെ പുതിയ പാസഞ്ചർ ടെർമിനലിലേക്കുള്ള ഗതാഗതം കൂടുതൽ സുഗമമാക്കുന്നതിനായി നിലവിലുണ്ടായിരുന്ന റൗണ്ട് എബൗട്ടുകൾ മാറ്റി പുതിയ സിഗ്നലുകൾ സ്ഥാപിക്കുകയും പുതിയ ഓവർപാസുകൾ നിർമ്മിക്കുകയും ചെയ്തിട്ടുണ്ട്. ഇതിനൊപ്പം ഈസ്റ്റ് ഹിദ്ദ് ഹൗസിംഗ് ടൗണിലേക്കുള്ള റോഡുകൾ അന്താരാഷ്ട്ര നിലവാരത്തിൽ വികസിപ്പിക്കുകയും വാഹനത്തിരക്ക് ഗണ്യമായി കുറയ്ക്കുന്നതിനായി പുതിയ ബൈപ്പാസ് പാതകൾ തുറക്കുകയും ചെയ്തിട്ടുണ്ടെന്നും പൊതുമരാമത്ത് മന്ത്രി കൂട്ടിച്ചേർത്തു.