പുണ്യനഗരങ്ങളായ മക്കയിലെയും മദീനയിലെയും ഹറം പള്ളികളിൽ തീർത്ഥാടകരെ സഹായിക്കാൻ ഇനി ബഹുഭാഷാ നിർമ്മിത ബുദ്ധി (AI) സ്മാർട്ട് റോബോട്ടുകളും. ഇരു ഹറം പള്ളികളിലെയും സ്ഥലങ്ങളെക്കുറിച്ചും ലഭ്യമായ വിവിധ സൗകര്യങ്ങളെക്കുറിച്ചും തീർത്ഥാടകർക്ക് വിവരം നൽകുന്നതിനാണ് അത്യാധുനിക റോബോട്ടുകളെ വിന്യസിച്ചിരിക്കുന്നത്. ഹറം മതകാര്യ പ്രസിഡൻസിയാണ് ഈ സ്മാർട്ട് സേവനം ഒരുക്കിയിരിക്കുന്നത്.

പള്ളികളിലെ വിവിധ ഇടങ്ങൾ പരിചയപ്പെടുത്തുന്നതിനൊപ്പം, തീർത്ഥാടകരുടെ മതപരമായ സംശയങ്ങൾക്കും അന്വേഷണങ്ങൾക്കും ഈ റോബോട്ടുകൾ മറുപടി നൽകും. വളരെ ലളിതമായ യൂസർ ഇന്റർഫേസ് ഉള്ളതിനാൽ ഏത് പ്രായത്തിലുള്ളവർക്കും ഇത് എളുപ്പത്തിൽ ഉപയോഗിക്കാനാകും. ലോകത്തിന്റെ വിവിധ ഭാഗങ്ങളിൽ നിന്നുള്ള ലക്ഷക്കണക്കിന് തീർത്ഥാടകർ എത്തുന്ന സാഹചര്യത്തിൽ, ഒന്നിലധികം ഭാഷകളിൽ ആശയവിനിമയം നടത്താൻ കഴിയുന്ന ഈ റോബോട്ടുകൾ വലിയ അനുഗ്രഹമാകും.

സാങ്കേതിക വിദ്യയുടെ സഹായത്തോടെ തീർത്ഥാടന അനുഭവം കൂടുതൽ സുഗമമാക്കുക എന്നതാണ് ഇതിലൂടെ ലക്ഷ്യമിടുന്നത്. ഇതിനോടകം തന്നെ പള്ളികളിൽ പലയിടത്തും റോബോട്ടുകളുടെ സേവനം സന്ദർശകർക്ക് ലഭ്യമായിത്തുടങ്ങി.