സൗദി അറേബ്യയിൽ മൂത്രാശയ കാൻസർ ചികിത്സയ്ക്കായി വികസിപ്പിച്ച പുതിയ വാക്സിന് സൗദി ഫുഡ് ആൻഡ് ഡ്രഗ് അതോറിറ്റി (SFDA) അനുമതി നൽകി. 'ആൻക്റ്റീവ' (Anktiva) എന്ന പേരിലറിയപ്പെടുന്ന ഈ മരുന്ന് അമേരിക്കയ്ക്കും ബ്രിട്ടനും പിന്നാലെയാണ് ഇപ്പോൾ സൗദിയിലും ഉപയോഗിക്കാൻ അനുമതി ലഭിക്കുന്നത്. പ്രായപൂർത്തിയായ രോഗികളിൽ ശസ്ത്രക്രിയ കൂടാതെ മറ്റ് ചികിത്സാ മാർഗങ്ങൾ ഫലിക്കാത്ത സാഹചര്യത്തിലാണ് ഈ മരുന്ന് ഉപയോഗിക്കുക.

സാധാരണയായി മൂത്രാശയ രോഗങ്ങൾക്ക് നൽകി വരുന്ന പ്രധാന ഔഷധമായ ബിസിജി (BCG) വാക്സിനോട് രോഗികൾ പ്രതികരിക്കാത്ത ഘട്ടത്തിലാണ് പുതിയ മരുന്ന് ഗുണകരമാകുന്നത്. ശസ്ത്രക്രിയ ഒഴിവാക്കാൻ ആഗ്രഹിക്കുന്നവർക്കും മറ്റ് പാർശ്വഫലങ്ങൾ നേരിടുന്നവർക്കും ആൻക്റ്റീവ വലിയ പ്രതീക്ഷ നൽകുന്നു. യൂറോപ്യൻ യൂണിയൻ നേരത്തെ തന്നെ ഈ മരുന്നിന് നിബന്ധനകളോടെയുള്ള അനുമതി നൽകിയിരുന്നു.

പ്രമുഖ ബയോ ഫാർമ കമ്പനിയുടെ നേതൃത്വത്തിലായിരിക്കും രാജ്യത്തുടനീളം ഈ മരുന്നിന്റെ വിതരണം നടക്കുക. സൗദി വിഷൻ 2030-ന്റെ ഭാഗമായി ആരോഗ്യരംഗത്ത് നടപ്പിലാക്കുന്ന നൂതന ചികിത്സാ പദ്ധതികളുടെ തുടർച്ചയായാണ് ഈ നീക്കം വിലയിരുത്തപ്പെടുന്നത്. കാൻസർ പ്രതിരോധ രംഗത്ത് കൂടുതൽ അത്യാധുനിക മരുന്നുകൾ ലഭ്യമാക്കുന്നതിലൂടെ മികച്ച ചികിത്സ ഉറപ്പാക്കാൻ ഇതിലൂടെ സാധിക്കും.