ദുരിതബാധിതർക്ക് കൈത്താങ്ങുമായി ഒമാൻ; നേപ്പാളിലേക്ക് അഞ്ച് വിമാനങ്ങളിൽ അടിയന്തര സഹായം

  1. Home
  2. International

ദുരിതബാധിതർക്ക് കൈത്താങ്ങുമായി ഒമാൻ; നേപ്പാളിലേക്ക് അഞ്ച് വിമാനങ്ങളിൽ അടിയന്തര സഹായം

oman


പ്രകൃതിദുരന്തത്തിൽ ദുരിതമനുഭവിക്കുന്ന നേപ്പാളിലെ ജനങ്ങൾക്ക് അടിയന്തര സഹായമെത്തിക്കാൻ ഒമാൻ എയർ ബ്രിഡ്ജ് ദൗത്യം ആരംഭിച്ചു. ഒമാൻ ചാരിറ്റബിൾ ഓർഗനൈസേഷന്റെ നേതൃത്വത്തിലാണ് ഈ വലിയ ദുരിതാശ്വാസ പ്രവർത്തനങ്ങൾ ഏകോപിപ്പിക്കുന്നത്. ഭക്ഷ്യവസ്തുക്കൾ, ടെന്റുകൾ, പുതപ്പുകൾ, ജനറേറ്ററുകൾ, പാചക-ലൈറ്റിങ് ഉപകരണങ്ങൾ, മറ്റ് അവശ്യ വീട്ടുപകരണങ്ങൾ എന്നിവയുമായി അഞ്ച് വിമാനങ്ങളാണ് നേപ്പാളിലേക്ക് തിരിക്കുന്നത്; ദുരിതബാധിതരുടെ പ്രയാസങ്ങൾ ലഘൂകരിക്കാനും അവരുടെ ജീവിതസാഹചര്യങ്ങൾ മെച്ചപ്പെടുത്താനും ലക്ഷ്യമിട്ടാണ് ഈ സഹായഹസ്തം.

മസ്കത്തിലെ നേപ്പാൾ എംബസിയുമായും നേപ്പാളിലെ ബന്ധപ്പെട്ട അധികൃതരുമായും വിശദമായ ചർച്ചകൾ നടത്തിയ ശേഷമാണ് ദുരിതാശ്വാസ വസ്തുക്കൾ തിരഞ്ഞെടുത്തതെന്ന് ഒമാൻ ചാരിറ്റബിൾ ഓർഗനൈസേഷൻ ആക്ടിങ് സി.ഇ.ഒ ബദർ ബിൻ മുഹമ്മദ് അൽ സാബി വ്യക്തമാക്കി. ദുരിതബാധിത പ്രദേശങ്ങളിലെ ജനങ്ങളുടെ അടിയന്തര ആവശ്യങ്ങൾ കൃത്യമായി മനസ്സിലാക്കിയാണ് ഇവയെല്ലാം സജ്ജമാക്കിയതെന്നും അദ്ദേഹം പറഞ്ഞു.

പ്രകൃതിദുരന്തങ്ങളിൽ അകപ്പെടുന്നവർക്കൊപ്പം നിൽക്കുകയെന്ന ഒമാന്റെ കാലങ്ങളായുള്ള മാനുഷിക നിലപാടാണ് ഇതിലൂടെ പ്രതിഫലിക്കുന്നത്; അന്താരാഷ്ട്ര സഹകരണത്തിന്റെയും ഐക്യദാർഢ്യത്തിന്റെയും മൂല്യങ്ങൾ ഉയർത്തിപ്പിടിച്ചാണ് ഒമാൻ ഈ ദൗത്യം നടപ്പാക്കുന്നതെന്നും അദ്ദേഹം കൂട്ടിച്ചേർത്തു.