സൗദി അറേബ്യയിൽ മധുരപാനീയങ്ങൾക്ക് പ്രത്യേക നികുതി (സെലക്ടീവ് ടാക്‌സ്) ഏർപ്പെടുത്തുന്ന പുതിയ നയം ജനുവരി ഒന്നു മുതൽ പ്രാബല്യത്തിൽ വരുമെന്ന് വ്യവസായ ധാതുവിഭവ മന്ത്രി ബന്ദർ അൽഖുറൈഫ് അറിയിച്ചു. പഞ്ചസാരയുടെ അളവ് കൂടുതലുള്ള പാനീയങ്ങൾക്കുള്ള നികുതി ഉയർത്തുന്നതാണ് ഈ പരിഷ്കരണം. ആരോഗ്യത്തിന് ഹാനികരമായ രീതിയിലുള്ള പഞ്ചസാരയുടെ ഉപഭോഗം കുറച്ച് പൊതുജനാരോഗ്യം സംരക്ഷിക്കുകയാണ് ഇതിലൂടെ ലക്ഷ്യമിടുന്നത്. വ്യവസായികൾ മുൻപ് ഉന്നയിച്ചിരുന്ന ഒരു പ്രധാന ആശങ്കയായിരുന്നു ഈ നികുതി വിഷയം. നിലവിൽ ഇതിന് പരിഹാരം കണ്ടെത്താൻ കഴിഞ്ഞതായി മന്ത്രി വ്യക്തമാക്കി.

പാനീയങ്ങളിലെ പഞ്ചസാര നികുതി പ്രശ്നം പരിഹരിക്കുന്നതിനായി ധനമന്ത്രാലയം, സകാത്ത്-നികുതി-കസ്റ്റംസ് അതോറിറ്റി, ആരോഗ്യ മന്ത്രാലയം എന്നിവ സമഗ്രമായ ചർച്ചകൾ നടത്തിയിരുന്നു. പൊതുജനാരോഗ്യ സംരക്ഷണവും പഞ്ചസാര ഉപഭോഗം കുറയ്ക്കലും ലക്ഷ്യമാക്കിയുള്ള ഒരു സമതുലിത നയമാണ് രൂപപ്പെടുത്തിയിട്ടുള്ളത്. ഇത് വ്യവസായങ്ങൾക്ക് ഉൽപ്പന്ന വികസനത്തിനും പുതുമകൾ കൊണ്ടുവരാനും അവസരം നൽകുന്ന തരത്തിലുള്ളതാണ്. ഗൾഫ് സഹകരണ കൗൺസിൽ (ജി.സി.സി) തലത്തിലുള്ള ഏകോപനവുമായി ബന്ധപ്പെട്ട വിഷയമായതിനാൽ ഇത് സങ്കീർണമായിരുന്നുവെന്നും, ബന്ധപ്പെട്ട എല്ലാ വിഭാഗങ്ങളും തമ്മിൽ സമഗ്രമായ ധാരണയിലെത്തിയ ശേഷമാണ് നികുതി നയത്തിലെ ഈ മാറ്റങ്ങൾ വരുത്തുന്നതെന്നും മന്ത്രി കൂട്ടിച്ചേർത്തു.