ജീവകാരുണ്യ പ്രവർത്തനങ്ങളുടെ ഭാഗമായി, ബംഗ്ലാദേശിലെ റോഹിങ്ക്യൻ അഭയാർഥികൾക്കായി സമഗ്ര ആരോഗ്യ പദ്ധതി പ്രഖ്യാപിച്ച് ഖത്തർ. ഖത്തർ ഫണ്ട് ഫോർ ഡെവലപ്‌മെന്റും ഖത്തർ റെഡ് ക്രസന്റ് സൊസൈറ്റിയും സംയുക്തമായി പ്രാദേശിക പങ്കാളികളുമായി സഹകരിച്ചാണ് 12 മാസം ദൈർഘ്യമുള്ള ഈ പദ്ധതി നടപ്പാക്കുന്നത്. പ്രൈമറി ഹെൽത്ത് കെയർ സെന്റർ വഴി ഏകദേശം 33,850 റോഹിങ്ക്യൻ അഭയാർഥികൾക്ക് ഇതിന്റെ പ്രയോജനം ലഭിക്കും.

അഭയാർഥികൾക്ക് 24 മണിക്കൂറും തടസ്സമില്ലാതെ അടിയന്തര വൈദ്യസഹായം ഉറപ്പാക്കുകയാണ് പദ്ധതിയുടെ പ്രധാന ലക്ഷ്യം. ഔട്ട്പേഷ്യന്റ് ക്ലിനിക്കുകൾ, ഇൻപേഷ്യന്റ് പരിചരണം, ഗർഭകാല-പ്രസവാനന്തര ശുശ്രൂഷകൾ, കുത്തിവെപ്പുകൾ, ലാബ് പരിശോധനകൾ, സൗജന്യ മരുന്നുവിതരണം എന്നിവ പദ്ധതിയിലൂടെ ലഭ്യമാക്കും.

പകർച്ചവ്യാധികൾ, മാറാരോഗങ്ങൾ, മാനസികാരോഗ്യം എന്നിവയ്ക്കുള്ള പിന്തുണയ്ക്ക് പുറമെ ആംബുലൻസ്, റഫറൽ സംവിധാനങ്ങളും ഏർപ്പെടുത്തും. മാതൃ-ശിശു പോഷകാഹാര ബോധവൽക്കരണം, പൊതുജനാരോഗ്യ വിദ്യാഭ്യാസം എന്നിവ വഴി അഭയാർഥി ക്യാമ്പുകളിലെ ആരോഗ്യനിലവാരം ഉയർത്താനും ഈ സംരംഭം ലക്ഷ്യമിടുന്നു.