ഖത്തറിലെ ഇ-കൊമേഴ്സ് മേഖലയിൽ ഗണ്യമായ വളർച്ച രേഖപ്പെടുത്തി. കഴിഞ്ഞ ഒരു വർഷത്തിനിടെ ഇടപാടുകളിൽ 15 ശതമാനം വർധനവാണുണ്ടായത് എന്ന് ഖത്തർ സെൻട്രൽ ബാങ്ക് പുറത്തുവിട്ട കണക്കുകൾ വ്യക്തമാക്കുന്നു.

ഇ-കൊമേഴ്സ് വഴിയും പോയിന്റ് ഓഫ് സെയിൽ (POS) വഴിയുമായി കഴിഞ്ഞ ഒരു വർഷത്തിനിടെ ഖത്തറിൽ 12.93 ബില്യൺ റിയാലിന്റെ ഇടപാടുകളാണ് നടന്നത്. ഇത് മുൻ വർഷത്തെ അപേക്ഷിച്ച് 14.95 ശതമാനം കൂടുതലാണ്. ഇതിൽ POS വഴി 8.6 ബില്യൺ റിയാലിന്റെയും ഇ-കൊമേഴ്സ് വഴി 4.2 ബില്യൺ റിയാലിന്റെയും ഇടപാടുകൾ നടന്നു. തൽക്ഷണ പേയ്‌മെന്റ് സേവനമായ ഫൗറാൻ വഴി മൂന്ന് ബില്യൺ റിയാലിന്റെ ഇടപാടുകൾ നടന്നതായും സെൻട്രൽ ബാങ്ക് അറിയിച്ചു.

സമീപകാലത്ത് രാജ്യത്തെ ഇ-കൊമേഴ്സ് മേഖല ആരോഗ്യകരമായ വളർച്ച കൈവരിച്ചതായി സെൻട്രൽ ബാങ്ക് റിപ്പോർട്ടിൽ പറയുന്നു. അടുത്ത മൂന്ന് വർഷത്തിനുള്ളിൽ വാർഷിക വളർച്ചാ നിരക്ക് 9.4 ശതമാനത്തിലെത്തിക്കാനാണ് ലക്ഷ്യമിടുന്നതെന്നും ബാങ്ക് വ്യക്തമാക്കി. ഏറ്റവും പുതിയ പേയ്മെന്റ് സർവീസായ ഫൗറാനിൽ 30 ലക്ഷത്തിലധികം അക്കൗണ്ടുകൾ രജിസ്റ്റർ ചെയ്തിട്ടുണ്ട്. ഈ മേഖലയിൽ 17 ശതമാനം വളർച്ച രേഖപ്പെടുത്തിയതായും സെൻട്രൽ ബാങ്ക് അറിയിച്ചു.