യുഎഇയിൽ തുടരുന്ന അസ്ഥിര കാലാവസ്ഥയെത്തുടർന്ന് അൽ ഐനിലെയും ദുബായിലെയും പ്രധാന വിനോദസഞ്ചാര കേന്ദ്രങ്ങൾ താൽക്കാലികമായി അടച്ചു. പൊതുജനങ്ങളുടെ സുരക്ഷ മുൻനിർത്തിയാണ് അൽ ഐൻ സിറ്റി മുനിസിപ്പാലിറ്റിയും ദുബായിലെ പ്രമുഖ വിനോദസഞ്ചാര കേന്ദ്രങ്ങളും ഈ തീരുമാനമെടുത്തത്. ഇന്ന് (മാർച്ച് 23 തിങ്കളാഴ്ച) കനത്ത മഴ തുടരുന്ന പശ്ചാത്തലത്തിലാണ് നടപടി.

അൽ ഐനിലെ പ്രശസ്തമായ ഗ്രീൻ മുബസ്സറ (Green Mubazzarah) അടുത്ത അറിയിപ്പ് ഉണ്ടാകുന്നത് വരെ താൽക്കാലികമായി അടച്ചിട്ടു. കാലാവസ്ഥ മെച്ചപ്പെടുകയും സുരക്ഷിതമാണെന്ന് ഉറപ്പുവരുത്തുകയും ചെയ്ത ശേഷം മാത്രമേ ഇവിടം വീണ്ടും തുറക്കൂ എന്ന് മുനിസിപ്പാലിറ്റി അറിയിച്ചു. ഇതിന് പുറമെ അൽ ഐനിലെ എല്ലാ പൊതു പാർക്കുകളും വിനോദ മേഖലകളും കളിസ്ഥലങ്ങളും മുൻകരുതൽ നടപടിയുടെ ഭാഗമായി അടച്ചിട്ടുണ്ട്. കാലാവസ്ഥാ സ്ഥിരത കൈവരിച്ച ശേഷം മാത്രമേ ഈ സൗകര്യങ്ങൾ വീണ്ടും പ്രവർത്തനമാരംഭിക്കൂ.

ദുബായിലും മഴ ശക്തമായി തുടരുന്നതിനാൽ ചില ഔട്ട്ഡോർ വിനോദകേന്ദ്രങ്ങൾ പ്രവർത്തനത്തിന് താൽക്കാലികമായി ഇടവേള നൽകിയിട്ടുണ്ട്. ദുബായിലെ പ്രശസ്തമായ അക്വാവെഞ്ചർ വാട്ടർപാർക്കും (Aquaventure Waterpark) മറൈൻ ആനിമൽ എക്സ്പീരിയൻസ് സോണുകളും ഇന്ന് അടച്ചിടുമെന്ന് അധികൃതർ അറിയിച്ചു. എന്നാൽ ഇൻഡോർ സൗകര്യമായ ലോസ്റ്റ് വേൾഡ് അക്വേറിയം (The Lost World Aquarium) സന്ദർശകർക്കായി തുറന്നിരിക്കും. ഇന്ന് (തിങ്കളാഴ്ച) ടിക്കറ്റ് ബുക്ക് ചെയ്തിട്ടുള്ളവർക്ക് ലഭ്യമായ മറ്റേതെങ്കിലും ദിവസം അത് ഉപയോഗിക്കാമെന്നും അധികൃതർ അറിയിച്ചു.