പശ്ചിമേഷ്യയിൽ യുദ്ധം അവസാനിപ്പിക്കാനുള്ള നയതന്ത്ര നീക്കങ്ങളുടെ ഭാഗമായി, തങ്ങളുടെ പക്കലുള്ള സമ്പുഷ്ടീകരിച്ച യുറേനിയം ശേഖരം മൂന്നാമതൊരു രാജ്യത്തേക്ക് മാറ്റാൻ ഇറാൻ സമ്മതിച്ചതായി റിപ്പോർട്ട്. അമേരിക്ക മുന്നോട്ടുവെച്ച സമാധാന നിർദ്ദേശങ്ങളോടുള്ള പ്രതികരണമായാണ് ഇറാൻ ഈ വിട്ടുവീഴ്ചയ്ക്ക് തയ്യാറായതെന്ന് ‘വാൾ സ്ട്രീറ്റ് ജേണൽ’ റിപ്പോർട്ട് ചെയ്തു. എന്നാൽ, സമാധാന ചർച്ചകൾ പരാജയപ്പെട്ടാൽ കൈമാറിയ യുറേനിയം തിരികെ നൽകണമെന്ന കർശന നിബന്ധനയും ഇറാൻ മുന്നോട്ടുവെച്ചിട്ടുണ്ട്.

ഇറാനിയൻ തുറമുഖങ്ങൾക്ക് ഏർപ്പെടുത്തിയ ഉപരോധം നീക്കുന്നതിനും ഹോർമുസ് കടലിടുക്ക് വഴിയുള്ള കപ്പൽ ഗതാഗതം പുനരാരംഭിക്കുന്നതിനും പകരമായി യുറേനിയം ശേഖരം നീക്കം ചെയ്യണമെന്നും ആണവ നിലയങ്ങൾ തകർക്കണമെന്നും യുഎസ് പ്രസിഡന്റ് ഡൊണാൾഡ് ട്രംപ് ആവശ്യപ്പെട്ടിരുന്നു. യുറേനിയം കൈമാറാൻ സമ്മതിച്ചെങ്കിലും, ആണവ നിലയങ്ങൾ തകർക്കണമെന്ന അമേരിക്കയുടെ ആവശ്യം ഇറാൻ പൂർണ്ണമായും തള്ളി. ഇറാന്റെ ആദ്യ മറുപടി ‘തികച്ചും അസ്വീകാര്യം’ ആണെന്ന് ട്രംപ് നേരത്തെ പ്രതികരിച്ചിരുന്നെങ്കിലും, യുറേനിയം കൈമാറ്റത്തിലെ ഈ പുതിയ നീക്കം ചർച്ചകളിൽ വഴിത്തിരിവായേക്കും.

അതേസമയം, ഇറാന്റെ ആണവ ശേഷി പൂർണ്ണമായും ഇല്ലാതാക്കാതെ യുദ്ധം അവസാനിപ്പിക്കില്ലെന്ന നിലപാടിലാണ് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. മധ്യസ്ഥരായ പാകിസ്താൻ വഴി സമാധാന ചർച്ചകൾ തുടരുന്നുണ്ടെങ്കിലും, ആണവ പദ്ധതികളുടെ ഭാവി സംബന്ധിച്ച തർക്കം ഇപ്പോഴും വലിയ പ്രതിസന്ധിയായി തുടരുകയാണ്. ഇറാന്റെ പുതിയ നിർദ്ദേശത്തോട് അമേരിക്ക എങ്ങനെ പ്രതികരിക്കുമെന്നതിനെ ആശ്രയിച്ചിരിക്കും മേഖലയിലെ സമാധാന സാധ്യതകൾ.