കുവൈത്തിൽ പൗരന്മാർക്കും താമസക്കാർക്കും തങ്ങളുടെ പഴയ റെസിഡൻഷ്യൽ വിലാസങ്ങളുടെ ഔദ്യോഗിക സർട്ടിഫിക്കറ്റുകൾ ഇനിമുതൽ 'സഹൽ' (Sahel) ആപ്പ് വഴി വിരൽത്തുമ്പിൽ ലഭിക്കും. പബ്ലിക് അതോറിറ്റി ഫോർ സിവിൽ ഇൻഫർമേഷൻ (PACI) ആണ് ഈ പുതിയ ഡിജിറ്റൽ സേവനം ആപ്പിൽ ലഭ്യമാക്കിയതായി ഔദ്യോഗികമായി അറിയിച്ചത്. ഒട്ടനവധി സർക്കാർ സേവനങ്ങൾക്ക് ആവശ്യമായി വരുന്ന ഈ സർട്ടിഫിക്കറ്റ് സ്വന്തമാക്കാൻ ഇനിമുതൽ പൊതുജനങ്ങൾ സിവിൽ ഐഡി സേവന കേന്ദ്രങ്ങൾ നേരിട്ട് സന്ദർശിക്കേണ്ടതില്ല.

സഹൽ ആപ്ലിക്കേഷനിലെ 'സർട്ടിഫിക്കറ്റ്' (Certificate Menu) വഴി പൗരന്മാർക്കും പ്രവാസികൾക്കും വളരെ എളുപ്പത്തിൽ ഈ സേവനം പ്രയോജനപ്പെടുത്താനും സർട്ടിഫിക്കറ്റുകൾ ഡൗൺലോഡ് ചെയ്യാനും സാധിക്കും. രാജ്യത്തെ ഡിജിറ്റൽ ഭരണ സംവിധാനങ്ങൾ കൂടുതൽ വികസിപ്പിക്കുന്നതിന്റെയും സർക്കാർ സേവനങ്ങൾ ജനങ്ങൾക്ക് കൂടുതൽ വേഗതയേറിയതും ലളിതവുമാക്കുന്നതിന്റെയും ഭാഗമായാണ് ഈ പുതിയ പരിഷ്കാരമെന്ന് പാസി (PACI) വ്യക്തമാക്കി. പ്രവാസികൾ ഉൾപ്പെടെയുള്ള ലക്ഷക്കണക്കിന് ആളുകൾക്ക് സിവിൽ ഐഡി ഓഫീസുകളിലെ നീണ്ട ക്യൂ ഒഴിവാക്കാൻ ഈ ഡിജിറ്റൽ സംവിധാനം ഏറെ സഹായകരമാകും.