ഇറാൻ പാസ്‌പോർട്ട് കൈവശമുള്ള യാത്രക്കാർക്ക് യുഎഇയിൽ പ്രവേശിക്കുന്നതിനും വിമാനത്താവളങ്ങൾ വഴി ട്രാൻസിറ്റ് ചെയ്യുന്നതിനും നിയന്ത്രണങ്ങൾ ഏർപ്പെടുത്തി. യുഎഇയിലെ പ്രമുഖ വിമാനക്കമ്പനികളായ എമിറേറ്റ്സ്, ഫ്ലൈദുബൈ, ഇത്തിഹാദ് എയർവേയ്‌സ് എന്നിവയാണ് യാത്രാ നിയമങ്ങൾ പുതുക്കിയത്. നിലവിൽ ഇറാനിയൻ പൗരന്മാർക്ക് യുഎഇയിൽ പ്രവേശിക്കാനോ ട്രാൻസിറ്റ് ചെയ്യാനോ അനുമതിയില്ലെന്ന് വിമാനക്കമ്പനികളുടെ ഔദ്യോഗിക വെബ്സൈറ്റുകൾ വ്യക്തമാക്കുന്നു. എന്നാൽ ഗോൾഡൻ വിസ കൈവശമുള്ളവർക്ക് ഈ നിയന്ത്രണങ്ങളിൽ ഇളവ് നൽകിയിട്ടുണ്ട്.

പ്രവേശനാനുമതിയുള്ളവർ: യാത്രാ അപ്ഡേറ്റുകൾ പ്രകാരം ചില പ്രത്യേക വിഭാഗങ്ങളിൽപ്പെട്ട ഇറാനിയൻ പൗരന്മാർക്ക് യുഎഇയിലേക്ക് വരുന്നതിനും ട്രാൻസിറ്റ് ചെയ്യുന്നതിനും തടസ്സമില്ല. യുഎഇ പൗരന്മാരുടെ പങ്കാളികൾ (ഭർത്താവ്/ഭാര്യ), യുഎഇ പൗരത്വമുള്ള സ്ത്രീകളുടെ മക്കൾ എന്നിവർക്ക് ഇളവുണ്ട്. കൂടാതെ കായികതാരങ്ങൾ, ബാങ്ക് ഉദ്യോഗസ്ഥർ, ഡോക്ടർമാർ, എൻജിനീയർമാർ, നിക്ഷേപകർ, മുതിർന്ന പ്രൊഫഷണലുകൾ, വ്യാപാരികൾ തുടങ്ങിയ പ്രൊഫഷണൽ വിഭാഗങ്ങൾക്കും നിയന്ത്രണങ്ങൾ ബാധകമല്ലെന്ന് എമിറേറ്റ്സ് അറിയിച്ചു.

വിമാന സർവീസുകൾ: മേഖലയിലെ സംഘർഷഭരിതമായ സാഹചര്യങ്ങളും വ്യോമഗതാഗത നിയന്ത്രണങ്ങളും മൂലം കഴിഞ്ഞ ഒരു മാസമായി ഇറാനിലേക്കും തിരിച്ചുമുള്ള വിമാന സർവീസുകൾ പരിമിതമായാണ് നടക്കുന്നത്. എങ്കിലും എമിറേറ്റ്സ്, ഇത്തിഹാദ്, ഫ്ലൈദുബൈ, എയർ അറേബ്യ എന്നീ വിമാനക്കമ്പനികൾ ഷെഡ്യൂളുകളിൽ മാറ്റം വരുത്തി ലോകമെമ്പാടുമുള്ള 250-ലധികം നഗരങ്ങളിലേക്ക് സർവീസുകൾ തുടരുന്നുണ്ട്. യാത്രക്കാർ വിമാനക്കമ്പനികളുമായി ബന്ധപ്പെട്ട് തങ്ങളുടെ യാത്രാ അനുമതി മുൻകൂട്ടി സ്ഥിരീകരിക്കണമെന്ന് അധികൃതർ നിർദ്ദേശിച്ചു.