പൊതുജനങ്ങളുമായി നേരിട്ടുള്ള ആശയവിനിമയം ശക്തമാക്കുന്നതിനും ഔദ്യോഗിക വിവരങ്ങൾ വേഗത്തിൽ ലഭ്യമാക്കുന്നതിനുമായി റോയൽ ഒമാൻ പൊലീസ് (ROP) ഔദ്യോഗിക വാട്സ്ആപ്പ് ചാനൽ ആരംഭിച്ചു. സുപ്രധാന അറിയിപ്പുകൾ, ബോധവൽക്കരണ സന്ദേശങ്ങൾ, ട്രാഫിക് അപ്ഡേറ്റുകൾ എന്നിവ ഇനി മുതൽ ഈ പ്ലാറ്റ്‌ഫോമിലൂടെ പൊതുജനങ്ങൾക്ക് നേരിട്ട് ലഭിക്കും.

ഡിജിറ്റൽ സാങ്കേതികവിദ്യ വഴി വ്യാജ വാർത്തകൾ തടഞ്ഞ്, സുരക്ഷിതവും സ്ഥിരീകരിച്ചതുമായ വിവരങ്ങൾ വേഗത്തിൽ ജനങ്ങളിലേക്ക് എത്തിക്കുകയാണ് ആർ.ഒ.പിയുടെ ലക്ഷ്യം. അടിയന്തര സാഹചര്യങ്ങളിലും അസാധാരണമായ സംഭവങ്ങളിലും നിർണായക മുന്നറിയിപ്പുകൾ നൽകാനും ഈ ചാനൽ ഉപയോഗിക്കും. പൊതുജനങ്ങളുടെ ആവശ്യപ്രകാരമാണ് ഒമാനിൽ ഏറെ ജനപ്രിയമായ വാട്സ്ആപ്പിൽ ഇങ്ങനെയൊരു സംവിധാനം ഒരുക്കിയത്.

ആർ.ഒ.പിയുടെ സോഷ്യൽ മീഡിയ പേജുകളിൽ നൽകിയിട്ടുള്ള ക്യുആർ (QR) കോഡ് സ്കാൻ ചെയ്തോ ഔദ്യോഗിക വെബ്‌സൈറ്റിലെ ലിങ്ക് വഴിയോ സ്വദേശികൾക്കും പ്രവാസികൾക്കും സന്ദർശകർക്കും ഈ ചാനൽ സബ്‌സ്‌ക്രൈബ് ചെയ്യാം.