ആഗോള ഗതാഗത, വിതരണ ശൃംഖലാ രംഗത്തെ പ്രമുഖർ അണിനിരക്കുന്ന രണ്ടാം 'ഗ്ലോബൽ ലോജിസ്റ്റിക്‌സ് ഫോറത്തിന്' സൗദി അറേബ്യ വേദിയാകുന്നു. സൗദി ഗതാഗത മന്ത്രാലയത്തിന്റെ നേതൃത്വത്തിൽ നവംബർ 29 മുതൽ ഡിസംബർ 1 വരെ റിയാദിലെ കിങ് അബ്ദുൽ അസീസ് ഇന്റർനാഷണൽ കോൺഫറൻസ് സെന്ററിലാണ് അന്താരാഷ്ട്ര ഉച്ചകോടി നടക്കുക. ഐക്യരാഷ്ട്രസഭയും സൗദി പോർട്ട്‌സ് അതോറിറ്റിയും ചേർന്ന് സംഘടിപ്പിക്കുന്ന 'യു.എൻ ഗ്ലോബൽ സപ്ലൈ ചെയിൻ ഫോറം 2026'-ഉം ഇതോടൊപ്പം നടക്കും.

മൂന്ന് ഭൂഖണ്ഡങ്ങളെ ബന്ധിപ്പിക്കുന്ന കേന്ദ്ര ലോജിസ്റ്റിക് ഹബ്ബായി സൗദിയെ മാറ്റുക എന്ന 'വിഷൻ 2030' ലക്ഷ്യത്തിന് വലിയ ഊർജം നൽകുന്നതാണ് ഈ ഫോറം. ലോജിസ്റ്റിക് സേവനങ്ങളിലെ നൂതന സാങ്കേതികവിദ്യകൾ, സുസ്ഥിര വിതരണ ശൃംഖലകൾ, അന്താരാഷ്ട്ര ഗതാഗത ബന്ധങ്ങൾ ശക്തിപ്പെടുത്തൽ എന്നിവയാണ് പ്രധാന ചർച്ചാവിഷയങ്ങൾ. 2024-ൽ നടന്ന ആദ്യ പതിപ്പിൽ 30-ലധികം രാജ്യങ്ങളിൽ നിന്നായി 13,000-ത്തിലധികം ആളുകൾ പങ്കെടുക്കുകയും 1,600 കോടി (16 ബില്യൺ) സൗദി റിയാലിലധികം മൂല്യമുള്ള 67 കരാറുകളിൽ ഒപ്പുവെക്കുകയും ചെയ്തിരുന്നു.