ഐ.ടി, ടെലികമ്മ്യൂണിക്കേഷൻ വികസന സൂചികയിൽ ആഗോളതലത്തിൽ ഒന്നാം സ്ഥാനം സ്വന്തമാക്കി സൗദി അറേബ്യ. ഡിജിറ്റൽ വികസനത്തിലെ സുസ്ഥിരത, ഡിജിറ്റൽ സമ്പദ്‌വ്യവസ്ഥ, ബഹിരാകാശ കാലാവസ്ഥാ നിരീക്ഷണം തുടങ്ങിയ മേഖലകളിലെ മുൻനിര പ്രകടനത്തെ മുൻനിർത്തിയാണ് രാജ്യത്തിന് ഈ നേട്ടം കൈവരിക്കാനായത്. ഇന്റർനാഷണൽ ടെലികമ്മ്യൂണിക്കേഷൻ യൂണിയനാണ് (ITU) ഏറ്റവും പുതിയ റിപ്പോർട്ട് പ്രസിദ്ധീകരിച്ചത്.

വിവര സാങ്കേതിക മന്ത്രാലയവുമായി സഹകരിച്ച് "ശാക്തീകരിക്കപ്പെട്ട ഭാവിക്കായുള്ള ഒരു സുസ്ഥിര സമ്മാനം" എന്ന പേരിൽ പുറത്തിറക്കിയ റിപ്പോർട്ടിൽ ആശയവിനിമയം, ബഹിരാകാശം, സാങ്കേതിക മേഖല എന്നിവയിലെ വികസനങ്ങളെ പ്രകീർത്തിക്കുന്നുണ്ട്. ഇ-മാലിന്യ മാനേജ്‌മെന്റ്, കൃത്രിമബുദ്ധി (AI), ഉപഗ്രഹ അധിഷ്ഠിത ഭൂമി നിരീക്ഷണം എന്നിവയും റിപ്പോർട്ടിൽ പ്രത്യേക നേട്ടങ്ങളായി എടുത്തുപറയുന്നു.

പൊതു-സ്വകാര്യ മേഖലകളിലെ 25-ലധികം സ്ഥാപനങ്ങൾ ഉൾപ്പെടുന്ന പരിസ്ഥിതി, സാമ്പത്തിക, സാമൂഹിക സുസ്ഥിര പദ്ധതികളിലൂടെ സാങ്കേതികവിദ്യയെ മികച്ച രീതിയിൽ പ്രയോജനപ്പെടുത്താൻ സൗദി അറേബ്യയ്ക്ക് സാധിച്ചതായി ഐ.ടി.യു റിപ്പോർട്ട് വ്യക്തമാക്കുന്നു.