ബഹ്റൈനിൽ വീണ്ടും സുരക്ഷാ ജാഗ്രതാ നിർദ്ദേശം; താമസക്കാരോട് സുരക്ഷിത സ്ഥാനങ്ങളിലേക്ക് മാറാൻ ആഭ്യന്തര മന്ത്രാലയത്തിന്റെ ആഹ്വാനം
മേഖലയിലെ സുരക്ഷാ സാഹചര്യങ്ങൾ കണക്കിലെടുത്ത് ബഹ്റൈൻ ആഭ്യന്തര മന്ത്രാലയം വീണ്ടും ജാഗ്രതാ നിർദ്ദേശം പുറപ്പെടുവിച്ചു. പൊതുജനങ്ങൾ പരിഭ്രാന്തരാകാതെ ശാന്തത പാലിക്കണമെന്നും, ഏറ്റവും അടുത്തുള്ള സുരക്ഷിത സ്ഥാനങ്ങളിലേക്ക് മാറണമെന്നും, ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം പിന്തുടരണമെന്നും മന്ത്രാലയം ആവശ്യപ്പെട്ടു. ഞായറാഴ്ച രാവിലെ 7.50-നാണ് പുതിയ മുന്നറിയിപ്പ് പുറത്തിറക്കിയത്. നേരത്തെ പുലർച്ചെ 5.32-നും സുരക്ഷയ്ക്ക് മുൻഗണന നൽകണമെന്നും ജാഗ്രത പാലിക്കണമെന്നും ആവശ്യപ്പെട്ട് മന്ത്രാലയം സമാനമായ നിർദ്ദേശം നൽകിയിരുന്നു. സ്ഥിരീകരിക്കാത്ത വാർത്തകൾ വിശ്വസിക്കരുതെന്നും അധികൃതരുമായി പൂർണ്ണമായി സഹകരിക്കണമെന്നും നിർദ്ദേശത്തിൽ പറയുന്നു.
പൊതുജനങ്ങളുടെ സുരക്ഷ മുൻനിർത്തിയുള്ള മുൻകരുതൽ നടപടിയായാണ് ഈ ജാഗ്രതാ നിർദ്ദേശം പുറപ്പെടുവിച്ചിരിക്കുന്നതെന്ന് ആഭ്യന്തര മന്ത്രാലയം വ്യക്തമാക്കി. എന്നാൽ ഭീഷണിയുടെ സ്വഭാവം എന്താണെന്നോ പുതിയ ആക്രമണങ്ങൾ ഉണ്ടായിട്ടുണ്ടോ എന്നോ മന്ത്രാലയം സ്ഥിരീകരിച്ചിട്ടില്ല. അമേരിക്കയും ഇറാനും തമ്മിലുള്ള സംഘർഷം രൂക്ഷമായി തുടരുന്ന പശ്ചാത്തലത്തിൽ അമേരിക്കൻ നാവികസേനയുടെ അഞ്ചാം കപ്പൽപ്പടയുടെ ആസ്ഥാനം സ്ഥിതി ചെയ്യുന്ന ബഹ്റൈന് വലിയ തന്ത്രപ്രധാനമായ പ്രാധാന്യമാണുള്ളത്. ഹോർമുസ് കടലിടുക്കിലെ തർക്കങ്ങളും ഗൾഫ് മേഖലയിലെ സുരക്ഷാ ആശങ്കകളും നിലനിൽക്കുന്നതിനിടെയാണ് ഈ പുതിയ മുന്നറിയിപ്പ്.
നേരത്തെ നവംബർ 13-ന് ഇറാൻ സൈന്യം ബഹ്റൈന് നേരെ രണ്ട് ആക്രമണ ഡ്രോണുകൾ തൊടുത്തുവിട്ടതായും അവ അമേരിക്കൻ സൈന്യം ആകാശത്തുവെച്ചുതന്നെ വെടിവെച്ചിട്ടതായും യുഎസ് സെൻട്രൽ കമാൻഡ് (സെന്റ്കോം) അറിയിച്ചിരുന്നു. ബഹ്റൈനിലെ അമേരിക്കൻ റഡാർ സംവിധാനം തകർത്തുവെന്ന ഇറാൻ റെവല്യൂഷണറി ഗാർഡിന്റെ അവകാശവാദം തള്ളിയ സെന്റ്കോം, ഡ്രോൺ ആക്രമണത്തിൽ ആർക്കും പരിക്കേൽക്കുകയോ നാശനഷ്ടങ്ങൾ സംഭവിക്കുകയോ ചെയ്തിട്ടില്ലെന്നും വ്യക്തമാക്കിയിരുന്നു.
