കുവൈത്ത് എയർവേസിന്റെ (Kuwait Airways) വിമാന സർവീസുകൾ പൂർണ്ണമായി റദ്ദാക്കിയിട്ടില്ലെന്നും, സർവീസുകൾ പതിവുപോലെ തുടരുന്നുണ്ടെന്നും അധികൃതർ വ്യക്തമാക്കി. രാജ്യത്തെ നിലവിലെ അടിയന്തര സാഹചര്യത്തിൽ കുവൈത്ത് അന്താരാഷ്ട്ര വിമാനത്താവളത്തിൽ ഏർപ്പെടുത്തിയ താൽക്കാലിക പ്രവർത്തന നിയന്ത്രണങ്ങളെ തുടർന്ന് തടസ്സപ്പെട്ട ചില സർവീസുകളുടെ സമയക്രമത്തിൽ മാറ്റം വരുത്തുക മാത്രമാണ് ചെയ്തതെന്ന് എയർലൈൻസ് വക്താവ് അറിയിച്ചു.

യാത്രക്കാരുടെ സുരക്ഷ ഉറപ്പാക്കുന്നതിനായി കമ്പനിയുടെ പ്രവർത്തന-സാങ്കേതിക വിഭാഗങ്ങൾ 24 മണിക്കൂറും സജീവമായി രംഗത്തുണ്ട്. വിമാന സമയക്രമങ്ങളെക്കുറിച്ചുള്ള ഏറ്റവും പുതിയ വിവരങ്ങളറിയാൻ യാത്രക്കാർ കുവൈത്ത് എയർവേയ്‌സിന്റെ ഔദ്യോഗിക അറിയിപ്പുകളും കസ്റ്റമർ സർവീസ് ചാനലുകളും മാത്രം പരിശോധിക്കണമെന്ന് അധികൃതർ അഭ്യർത്ഥിച്ചു. കഴിഞ്ഞ ദിവസങ്ങളിൽ രാജ്യത്തിന് നേരെ ഉണ്ടായ ആക്രമണങ്ങളെ തുടർന്ന് സുരക്ഷാ മുൻകരുതലിന്റെ ഭാഗമായി ചുരുങ്ങിയ സമയങ്ങളിൽ വിമാന സർവീസുകൾക്ക് തടസ്സം നേരിട്ടിരുന്നു.