യു.എ.ഇ ദേശീയ പതാക ദിനമായ (UAE Flag Day) നവംബർ 3-ന് (ചൊവ്വാഴ്ച) രാജ്യത്തുടനീളം ദേശീയ പതാക ഉയർത്താൻ യു.എ.ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തും ആഹ്വാനം ചെയ്തു. പൗരന്മാരും പ്രവാസികളും സർക്കാർ-സ്വകാര്യ സ്ഥാപനങ്ങളും മന്ത്രാലയങ്ങളും സ്‌കൂളുകളും സർവ്വകലാശാലകളും വീടുകളും ഉൾപ്പെടെ രാജ്യത്തിന്റെ നാനാഭാഗങ്ങളിലും പതാക ഉയർത്തി ആഘോഷത്തിൽ പങ്കാളികളാകണമെന്ന് അദ്ദേഹം ആവശ്യപ്പെട്ടു.

2004-ൽ യു.എ.ഇയുടെ രണ്ടാമത്തെ പ്രസിഡന്റായി ഷെയ്ഖ് ഖലീഫ ബിൻ സായിദ് അൽ നഹ്യാൻ അധികാരമേറ്റതിന്റെ ഓർമ്മ പുതുക്കലായാണ് എല്ലാ വർഷവും നവംബർ 3 പതാക ദിനമായി ആചരിക്കുന്നത്. 2012 ഡിസംബറിലാണ് ഷെയ്ഖ് മുഹമ്മദ് ഈ ദിനം പ്രഖ്യാപിച്ചതും 2013 മുതൽ ഔദ്യോഗികമായി ആഘോഷിച്ച് തുടങ്ങിയതും.

രാവിലെ 11 മണിക്കാണ് രാജ്യത്തുടനീളം ഒരേസമയം ദേശീയ പതാക ഉയർത്തുന്നത്. ഡിസംബർ 2-ലെ ദേശീയ ദിനം (ഈദ് അൽ ഇത്തിഹാദ്) വരെയുള്ള ഒരു മാസം നീളുന്ന ദേശീയ ആഘോഷങ്ങളുടെ തുടക്കം കുറിക്കുന്നത് കൂടിയാണ് പതാക ദിനം.