അന്താരാഷ്ട്ര തലത്തിൽ തന്ത്രപ്രധാനമായ ഹോർമുസ് കടലിടുക്ക് വഴി കടന്നുപോകാൻ ആഗ്രഹിക്കുന്ന എല്ലാ വാണിജ്യ കപ്പലുകൾക്കും പാത തുറന്നിരിക്കുന്നുവെന്ന് യുഎസ് സേന. മേഖലയിലെ ഇറാന്റെ അനാവശ്യ ഭീഷണികൾ നേരിടാനും നാവിഗേഷൻ സ്വാതന്ത്ര്യം ഉറപ്പാക്കാനും സൈന്യത്തെ സജ്ജമാക്കിയിട്ടുണ്ടെന്ന് യുഎസ് സെൻട്രൽ കമാൻഡ് (CENTCOM) അറിയിച്ചു. ഹോർമുസ് കടലിടുക്കിന് മേൽ ഇറാന് യാതൊരുവിധ നിയന്ത്രണവുമില്ലെന്നും കപ്പൽ ഗതാഗതം നിലവിൽ സുഗമമാണെന്നും യുഎസ് കൂട്ടിച്ചേർത്തു. ഹോർമുസ് അടച്ചിട്ടിരിക്കുകയാണെന്ന് ഇറാൻ പ്രഖ്യാപിച്ചതിന് തൊട്ടുപിന്നാലെയാണ് യുഎസ് സൈന്യത്തിന്റെ പ്രതികരണം.

കഴിഞ്ഞ ആഴ്ച മുതൽ ഇരുരാജ്യങ്ങളും തമ്മിൽ പുനരാരംഭിച്ച കടുത്ത സൈനിക സംഘർഷങ്ങൾക്ക് പിന്നാലെയാണ് ഹോർമുസ് അടച്ചതായി ഇറാൻ പ്രഖ്യാപിച്ചത്. ഇറാന് ഹോർമുസ് കടലിടുക്ക് ഡസൻ കണക്കിന് ആണവ ബോംബുകളേക്കാൾ പ്രധാനമാണെന്നും ഏത് സാഹചര്യത്തിലും അത് സംരക്ഷിക്കുമെന്നും ഇറാന്റെ പരമോന്നത നേതാവിന്റെ ഉപദേഷ്ടാവ് മേജർ ജനറൽ മൊഹ്‌സിൻ റെസായ് വ്യക്തമാക്കി. ഹോർമുസ് കടലിടുക്കിൽ വെച്ച് കപ്പലുകൾ ആക്രമിക്കപ്പെട്ടതിന് പിന്നാലെയാണ് ഇറാനും യുഎസും തമ്മിലുള്ള വെടിനിർത്തൽ അവസാനിച്ചതും സംഘർഷം വീണ്ടും ശക്തമായതും. ഇറാനിലെ താവളങ്ങൾക്ക് നേരെ യുഎസ് ആക്രമണം നടത്തിയതിന് പ്രതികാരമായി, ഗൾഫ് രാജ്യങ്ങളിലെ യുഎസ് സൈനിക കേന്ദ്രങ്ങളെ ലക്ഷ്യമിട്ട് ഇറാനും പ്രത്യാക്രമണങ്ങൾ നടത്തിയിരുന്നു. ഇതിന്റെ തുടർച്ചയായാണ് ഹോർമുസ് അടയ്ക്കുന്നതായി ഇറാൻ ഔദ്യോഗികമായി പ്രഖ്യാപിച്ചത്.

എന്നാൽ, ആഗോളതലത്തിൽ ചരക്കുകളും ഊർജ്ജവും കടത്തിവിടാൻ വാണിജ്യ കപ്പലുകൾ ഉപയോഗിക്കുന്ന ഈ അന്താരാഷ്ട്ര ജലപാതയ്ക്ക് മേൽ ഇറാന് അവകാശവാദങ്ങൾ ഉന്നയിക്കാനാകില്ലെന്ന് യുഎസ് വ്യക്തമാക്കി. കഴിഞ്ഞ രണ്ട് മാസത്തിനിടെ 800-ലധികം കപ്പലുകളുടെയും 400 ദശലക്ഷത്തിലധികം ബാരൽ ക്രൂഡ് ഓയിലിന്റെയും സുരക്ഷിതമായ യാത്രയ്ക്ക് യുഎസ് സേന സൗകര്യമൊരുക്കിയിട്ടുണ്ടെന്നും, കഴിഞ്ഞ ഏഴ് ദിവസത്തിനുള്ളിൽ മാത്രം 140-ലധികം കപ്പലുകൾ ഈ കടലിടുക്കിലൂടെ സുരക്ഷിതമായി കടന്നുപോയിട്ടുണ്ടെന്നും യുഎസ് സെൻട്രൽ കമാൻഡ് അറിയിച്ചു.