ബഹ്‌റൈനിലെ വിവിധ സർക്കാർ പോർട്ടലുകൾ, ആപ്പുകൾ, മറ്റ് ഇലക്ട്രോണിക് സേവനങ്ങൾ എന്നിവയ്ക്ക് താൽക്കാലിക സാങ്കേതിക തടസ്സം നേരിടുന്നതായി ഇൻഫർമേഷൻ ആൻഡ് ഇ-ഗവൺമെന്റ് അതോറിറ്റി (iGA) അറിയിച്ചു. പൗരന്മാർക്കും താമസക്കാർക്കും സർക്കാർ വെബ്‌സൈറ്റുകൾ ഉപയോഗിക്കുന്നതിലും ഓൺലൈൻ ഇടപാടുകൾ നടത്തുന്നതിലും നിലവിൽ പ്രയാസങ്ങൾ നേരിടുന്നുണ്ട്.

അപ്രതീക്ഷിതമായ സാങ്കേതിക തകരാറുകൾ കാരണമാണ് സേവനങ്ങൾ തടസ്സപ്പെട്ടത്. പ്രശ്നം എത്രയും വേഗം പരിഹരിക്കാനും ഡിജിറ്റൽ സേവനങ്ങൾ പൂർവസ്ഥിതിയിലാക്കാനുമായി വിദഗ്ധ സാങ്കേതിക സംഘം അടിയന്തരമായി പ്രവർത്തിച്ചു വരികയാണെന്ന് ഐ.ജി.എ വ്യക്തമാക്കി. ഐഡി കാർഡ് സേവനങ്ങൾ, പേയ്‌മെന്റ് പോർട്ടലുകൾ തുടങ്ങിയവ ഉപയോഗിക്കുന്നവർക്ക് നിലവിൽ തടസ്സമുണ്ടായേക്കാം.

സേവനങ്ങൾ തടസ്സപ്പെട്ടതിലുണ്ടായ ബുദ്ധിമുട്ടിൽ അതോറിറ്റി ഖേദം പ്രകടിപ്പിച്ചു. സാങ്കേതിക തകരാറുകൾ പരിഹരിച്ചാലുടൻ ഔദ്യോഗിക ചാനലുകൾ വഴി അറിയിപ്പ് നൽകുമെന്നും പൊതുജനങ്ങൾക്ക് തടസ്സമില്ലാത്ത സേവനം ഉറപ്പാക്കാൻ അതോറിറ്റി പ്രതിജ്ഞാബദ്ധമാണെന്നും അറിയിപ്പിൽ പറയുന്നു.