ഒമാനിൽ വരും ദിവസങ്ങളിൽ അന്തരീക്ഷ താപനില കുറയുമെന്നും രാജ്യത്തിന്റെ വിവിധ ഭാഗങ്ങളിൽ ഒറ്റപ്പെട്ട മഴയ്ക്ക് സാധ്യതയുണ്ടെന്നും സിവിൽ ഏവിയേഷൻ അതോറിറ്റി അറിയിച്ചു. താഴ്ന്ന മർദ്ദ പാതയുടെ (Trough of low pressure) സ്വാധീനം മൂലമാണ് കാലാവസ്ഥയിൽ ഈ മാറ്റം അനുഭവപ്പെടുന്നത്. വ്യാഴാഴ്ച വരെ രാജ്യത്തിന്റെ പല ഭാഗങ്ങളും മേഘാവൃതമായിരിക്കുമെന്നും കാലാവസ്ഥാ പ്രവചനത്തിൽ പറയുന്നു. മുസന്ദം ഗവർണറേറ്റ്, പടിഞ്ഞാറൻ അൽ ഹജർ മലനിരകൾ, ദോഫാർ തീരപ്രദേശങ്ങൾ എന്നിവിടങ്ങളിലാണ് നിലവിൽ നേരിയ മഴയ്ക്ക് സാധ്യതയുള്ളത്.

ഈ ആഴ്ച മധ്യത്തോടെ കാലാവസ്ഥാ വ്യതിയാനം കൂടുതൽ ശക്തിപ്പെടുമെന്നാണ് നിരീക്ഷണം. ബുധൻ, വ്യാഴം ദിവസങ്ങളിൽ മേഘങ്ങൾ വ്യാപകമായി രൂപപ്പെടാൻ സാധ്യതയുള്ളതിനാൽ വടക്കൻ ബാത്തിന, തെക്കൻ ബാത്തിന, മസ്കത്ത് ഗവർണറേറ്റിലെ ചില ഭാഗങ്ങൾ, അൽ ഹജർ മലനിരകൾ, അറേബ്യൻ കടൽത്തീര പ്രദേശങ്ങൾ എന്നിവിടങ്ങളിൽ വ്യത്യസ്ത തോതിൽ മഴ ലഭിച്ചേക്കും. താപനില കുറയുന്നതോടെ രാജ്യത്ത് തണുത്ത കാലാവസ്ഥ അനുഭവപ്പെടും.

കാലാവസ്ഥാ മാറ്റങ്ങൾ സൂക്ഷ്മമായി നിരീക്ഷിച്ചു വരികയാണെന്നും വരും ദിവസങ്ങളിൽ കൂടുതൽ നിർദ്ദേശങ്ങൾ പുറപ്പെടുവിക്കുമെന്നും ഒമാൻ കാലാവസ്ഥാ നിരീക്ഷണ കേന്ദ്രം വ്യക്തമാക്കി. മഴയുള്ള സമയങ്ങളിൽ വാദികൾ മുറിച്ചുകടക്കരുതെന്നും കടലിൽ പോകുന്നവർ ജാഗ്രത പാലിക്കണമെന്നും അധികൃതർ പ്രവാസികളടക്കമുള്ള പൊതുജനങ്ങളോട് അഭ്യർത്ഥിച്ചു.