ഒമാനിലെ സുൽത്താൻ തുർക്കി ബിൻ സഈദ് റോഡ് വികസന പദ്ധതിയുടെ രണ്ടാം ഘട്ടത്തിലെ (ഫേസ് 2) പാർട്ട് രണ്ടായ ഏഴ് കിലോമീറ്റർ പാത ഗതാഗതത്തിനായി തുറന്നുകൊടുത്തു. ഒമാൻ ഗതാഗത, വാർത്താവിനിമയ, വിവരസാങ്കേതിക മന്ത്രാലയം റോയൽ ഒമാൻ പൊലീസുമായി സഹകരിച്ചാണ് ഈ നിർണായക പാതയുടെ നിർമ്മാണം പൂർത്തിയാക്കിയത്. തെക്കൻ ശർഖിയ ഗവർണറേറ്റിലെ അൽ കാമിൽ വൽ വാഫി, സൂർ വിലായത്തുകളെ തമ്മിൽ ബന്ധിപ്പിക്കുന്നതാണ് ഈ പുതിയ റൂട്ട്. മസ്‌ലഖിൽ നിന്ന് ആരംഭിച്ച് റോയൽ ആർമി ഓഫ് ഒമാൻ ക്യാമ്പിന് സമീപമുള്ള സൈഹുൽ മതാർ വരെയാണ് ഈ പാത നീളുന്നത്.

പുതിയ റോഡ് നിലവിൽ വന്നതോടെ അൽ കാമിൽ, അൽ വാഫി ഭാഗങ്ങളിൽ നിന്ന് വരുന്ന വാഹനങ്ങൾക്ക് സൂർ ഗേറ്റ് വഴി സുഗമമായി കടന്നുപോകാൻ സാധിക്കും. പാത ഗതാഗതത്തിന് സജ്ജമായതോടെ ഈ മേഖലയിൽ അനുഭവപ്പെട്ടിരുന്ന കടുത്ത ഗതാഗതക്കുരുക്കിന് വലിയ പരിഹാരമാകുമെന്നാണ് കരുതുന്നത്. തെക്കൻ ശർഖിയ ഗവർണറേറ്റിലെ റോഡ് ശൃംഖല വികസിപ്പിക്കുന്നതിനും വിവിധ വിലായത്തുകൾ തമ്മിലുള്ള ബന്ധം കൂടുതൽ ശക്തിപ്പെടുത്തുന്നതിനുമുള്ള മന്ത്രാലയത്തിന്റെ തന്ത്രപ്രധാനമായ പദ്ധതികളുടെ ഭാഗമായാണ് ഇത് നടപ്പിലാക്കിയത്.

മേഖലയിലെ സാമ്പത്തിക, വിനോദസഞ്ചാര, വികസന പ്രവർത്തനങ്ങൾക്ക് ഈ പുതിയ പാത വലിയ ഉണർവേകും. അത്യാധുനിക എഞ്ചിനീയറിങ് മാനദണ്ഡങ്ങൾ പൂർണ്ണമായി പാലിച്ചാണ് ഈ ഇരട്ടപ്പാത (ഡ്യുവൽ കാരേജ്‌വേ) നിർമ്മിച്ചിരിക്കുന്നത്. റോഡിന്റെ ചില ഭാഗങ്ങളിൽ ഇരുവശങ്ങളിലേക്കുമായി മൂന്ന് വരി പാതകൾ വീതമുണ്ട്. കൂടാതെ ഫ്ലൈഓവറുകൾ, വാദി ക്രോസിങ്ങുകൾ, അടിപ്പാതകൾ (തുരങ്കങ്ങൾ), കൾവർട്ടുകൾ എന്നിവയും ഇതിന്റെ ഭാഗമായി നിർമ്മിച്ചിട്ടുണ്ട്. സ്റ്റീൽ-കോൺക്രീറ്റ് ബാരിയറുകൾ, ആധുനിക മുന്നറിയിപ്പ് - ദിശാ സൂചക ബോർഡുകൾ, കൃത്യമായ റോഡ് മാർക്കിങ്ങുകൾ എന്നിവയുൾപ്പെടെയുള്ള എല്ലാ സുരക്ഷാ സംവിധാനങ്ങളും പുതിയ പാതയിൽ പൂർണ്ണമായി സജ്ജീകരിച്ചിട്ടുണ്ടെന്ന് മന്ത്രാലയം വ്യക്തമാക്കി.