ബഹ്‌റൈനിൽ ഇന്ന് കാലാവസ്ഥയിൽ വലിയ അസ്ഥിരത പ്രകടമാകുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. പകൽ സമയത്ത് ചിതറിക്കിടക്കുന്ന മഴയ്ക്ക് സാധ്യതയുണ്ടെന്നും എന്നാൽ രാത്രിയോടെ ഇടിമിന്നലോടു കൂടിയ ശക്തമായ മഴ പെയ്യാൻ സാധ്യതയുണ്ടെന്നുമാണ് റിപ്പോർട്ട്. പൊതുവെ മിതമായ കാറ്റാണ് പ്രതീക്ഷിക്കുന്നതെങ്കിലും, രാത്രിയിൽ വീശിയടിക്കുന്ന കാറ്റിന്റെ വേഗത 30 നോട്ട്സ് വരെ ഉയരാൻ സാധ്യതയുള്ളതിനാൽ അതീവ ജാഗ്രത പാലിക്കണം.

കാറ്റ് ശക്തമാകുന്നതോടെ കടലിൽ തിരമാലകൾ 7 അടി വരെ ഉയർന്നേക്കാം. അതിനാൽ മത്സ്യത്തൊഴിലാളികളും കടലിൽ വിനോദസഞ്ചാരത്തിൽ ഏർപ്പെടുന്നവരും ജാഗ്രത പാലിക്കണമെന്നും കടലിൽ ഇറങ്ങുന്നത് ഒഴിവാക്കണമെന്നും അധികൃതർ നിർദ്ദേശിച്ചു. ഇന്ന് രാജ്യത്ത് രേഖപ്പെടുത്താവുന്ന പരമാവധി താപനില 29 ഡിഗ്രി സെൽഷ്യസും കുറഞ്ഞ താപനില 21 ഡിഗ്രി സെൽഷ്യസും ആയിരിക്കും.

കാലാവസ്ഥാ വ്യതിയാനം കണക്കിലെടുത്ത് പുറത്തിറങ്ങുന്നവരും വാഹനങ്ങൾ കൈകാര്യം ചെയ്യുന്നവരും ആവശ്യമായ മുൻകരുതലുകൾ സ്വീകരിക്കണം. ശക്തമായ കാറ്റിനും ഇടിമിന്നലിനും സാധ്യതയുള്ളതിനാൽ തുറസായ സ്ഥലങ്ങളിൽ നിൽക്കുന്നത് ഒഴിവാക്കേണ്ടതാണ്. ഔദ്യോഗിക അറിയിപ്പുകൾ നിരന്തരം ശ്രദ്ധിക്കണമെന്നും അടിയന്തര സാഹചര്യങ്ങളിൽ അധികൃതരുമായി ബന്ധപ്പെടണമെന്നും സിവിൽ ഡിഫൻസ് അറിയിച്ചു.