മക്കയിലെ ഭക്ഷണ വിതരണ ശൃംഖല കൂടുതൽ സുതാര്യവും കാര്യക്ഷമവുമാക്കാൻ 'മുവരിദി' (Mawaridi) എന്ന പേരിൽ പുതിയ ഡിജിറ്റൽ പ്ലാറ്റ്‌ഫോം പുറത്തിറക്കി. സൗദി മുനിസിപ്പൽ ഭവന നിർമ്മാണ മന്ത്രി മാജിദ് അൽ ഹുഖൈൽ ആണ് പദ്ധതി ഉദ്ഘാടനം ചെയ്തത്. ഭക്ഷണ വിതരണക്കാരെയും കാറ്ററിംഗ് കമ്പനികളെയും ഒരൊറ്റ പ്ലാറ്റ്‌ഫോമിന് കീഴിൽ കൊണ്ടുവരുന്നതിലൂടെ ഭക്ഷണത്തിന്റെ ഗുണനിലവാരവും വിതരണവും കൃത്യമായി നിരീക്ഷിക്കാൻ ഈ സംവിധാനത്തിലൂടെ സാധിക്കും.

പ്രതിവർഷം എത്തുന്ന 18 ലക്ഷത്തിലധികം ഹാജിമാർക്കും ദശലക്ഷക്കണക്കിന് ഉംറ തീർത്ഥാടകർക്കും തടസ്സമില്ലാതെ ഭക്ഷണം എത്തിക്കുകയാണ് പദ്ധതിയുടെ പ്രധാന ലക്ഷ്യം. ഹജ്ജ്, ഉംറ സീസണുകളിൽ ഭക്ഷണത്തിന്റെ ആവശ്യകത മുൻകൂട്ടി കണക്കാക്കാനും ഓർഡറുകൾ ഡിജിറ്റലായി നിയന്ത്രിക്കാനും ഇതുവഴി സാധിക്കും. വിതരണക്കാർക്ക് തങ്ങളുടെ സ്റ്റോക്കുകൾ കാര്യക്ഷമമായി കൈകാര്യം ചെയ്യാനും ഈ പ്ലാറ്റ്‌ഫോം സൗകര്യമൊരുക്കുന്നു.

ഭക്ഷണ വിതരണത്തിലെ കാലതാമസം ഒഴിവാക്കാനും തീർത്ഥാടകർക്ക് മികച്ച സേവനം ഉറപ്പാക്കാനും 'മുവരിദി' പ്ലാറ്റ്‌ഫോം സഹായിക്കുമെന്ന് മന്ത്രാലയം വ്യക്തമാക്കി. മക്കയിലെ വിതരണ ശൃംഖലയെ പൂർണ്ണമായും ഡിജിറ്റലൈസ് ചെയ്യുന്നതിലൂടെ വലിയൊരു മുന്നേറ്റമാണ് കാറ്ററിംഗ് രംഗത്ത് പ്രതീക്ഷിക്കുന്നത്.

English Slug: Saudi Arabia launches 'Mawaridi' digital platform to streamline food supply for Hajj and Umrah pilgrims in Makkah.