അൽ ബാദി ഇന്റർചേഞ്ചിൽ ആറ് ആഴ്ചത്തേക്ക് താത്കാലിക ഗതാഗത നിയന്ത്രണം ഏർപ്പെടുത്തുന്നതായി ഖത്തർ പൊതുമരാമത്ത് വിഭാഗമായ 'അഷ്ഗാൽ' അറിയിച്ചു. ഇന്റർചേഞ്ചിന്റെ എല്ലാ ദിശകളിലേക്കുമുള്ള ഗതാഗതത്തെ ഈ നിയന്ത്രണം ബാധിക്കും. ഡ്രെയിനേജ് അറ്റകുറ്റപ്പണികളും നവീകരണ പ്രവർത്തനങ്ങളും നടത്തുന്നതിന്റെ ഭാഗമായാണ് നടപടി. ഞായറാഴ്ച ആരംഭിച്ച ഈ ഗതാഗത നിയന്ത്രണം മെയ് 29 വെള്ളിയാഴ്ച രാവിലെ 10 മണി വരെ നീണ്ടുനിൽക്കുമെന്ന് അധികൃതർ വ്യക്തമാക്കി.

നിർമ്മാണ പ്രവർത്തനങ്ങൾ നടക്കുന്ന സാഹചര്യത്തിൽ വാഹനയാത്രക്കാർ അതീവ ജാഗ്രത പാലിക്കണമെന്ന് അഷ്ഗാൽ നിർദ്ദേശിച്ചു. നിശ്ചിത സ്ഥലങ്ങളിൽ ഏർപ്പെടുത്തിയിട്ടുള്ള വേഗത പരിധി കർശനമായി പാലിക്കണം. യാത്രക്കാർ തങ്ങളുടെ ലക്ഷ്യസ്ഥാനങ്ങളിൽ സുരക്ഷിതമായി എത്തുന്നതിന് ലഭ്യമായ ബദൽ റോഡുകൾ ഉപയോഗപ്പെടുത്തണമെന്നും അധികൃതർ അഭ്യർത്ഥിച്ചു. ഡ്രൈവർമാർ ട്രാഫിക് അടയാളങ്ങൾ ശ്രദ്ധിക്കുകയും സുരക്ഷാ നിർദ്ദേശങ്ങൾ പാലിക്കുകയും ചെയ്യേണ്ടത് അത്യാവശ്യമാണ്.

റോഡ് നവീകരണ പ്രവർത്തനങ്ങൾ വേഗത്തിൽ പൂർത്തിയാക്കാൻ പൊതുജനങ്ങളുടെ പൂർണ്ണ സഹകരണം പ്രതീക്ഷിക്കുന്നതായി അഷ്ഗാൽ അറിയിച്ചു. ദോഹയിലെ പ്രധാന പാതകളിലൊന്നായ ഇവിടെ നിയന്ത്രണങ്ങൾ വരുന്നതോടെ തിരക്ക് വർദ്ധിക്കാൻ സാധ്യതയുള്ളതിനാൽ യാത്രകൾ മുൻകൂട്ടി പ്ലാൻ ചെയ്യുന്നത് നന്നായിരിക്കും. വരും ദിവസങ്ങളിലും കൂടുതൽ റോഡ് നവീകരണ പ്രവർത്തനങ്ങൾ നഗരത്തിന്റെ വിവിധ ഭാഗങ്ങളിൽ ഉണ്ടാകുമെന്നാണ് സൂചന.