യു.എ.ഇയിലെ ബാങ്കുകളും ധനകാര്യ സ്ഥാപനങ്ങളും ലൈസൻസുള്ള എക്സ്ചേഞ്ചുകളും ഉപഭോക്താക്കൾക്കായി രാജ്യത്തിന്റെ പുതിയ ദേശീയ പേയ്‌മെന്റ് കാർഡായ 'ജയ് വാൻ' (Jaywan) വിതരണം ചെയ്യാൻ ആരംഭിച്ചു. യു.എ.ഇ വൈസ് പ്രസിഡന്റും ഉപപ്രധാനമന്ത്രിയും പ്രസിഡൻഷ്യൽ കോർട്ട് ചെയർമാനും യു.എ.ഇ സെൻട്രൽ ബാങ്ക് ബോർഡ് ഓഫ് ഡയറക്‌ടേഴ്‌സ് ചെയർമാനുമായ ശൈഖ് മൻസൂർ ബിൻ സായിദ് ആൽ നഹ്‌യാൻ കാർഡിന്റെ ഔദ്യോഗിക ലോഞ്ച് പ്രഖ്യാപിച്ചു. വരും മാസങ്ങളിൽ വിവിധ ഘട്ടങ്ങളിലായാണ് കാർഡുകൾ ഉപഭോക്താക്കളിലേക്ക് പൂർണ്ണമായി എത്തുക.

രാജ്യത്തെ പേയ്‌മെന്റ് സംവിധാനങ്ങൾ കൂടുതൽ കരുത്തുറ്റതാക്കാനും ദേശീയ സാമ്പത്തിക മുൻഗണനകൾക്ക് അനുസൃതമായി സുരക്ഷിതവും കാര്യക്ഷമവുമായ ഡിജിറ്റൽ സംവിധാനം ഒരുക്കുന്നതിനുമാണ് ജയ് വാൻ കാർഡ് അവതരിപ്പിച്ചത്. യു.എ.ഇ സാമ്പത്തിക മേഖലയുടെ ഡിജിറ്റൽ പരിവർത്തനത്തിലും ദേശീയ പേയ്‌മെന്റ് ശൃംഖലയുടെ കാര്യക്ഷമത വർദ്ധിപ്പിക്കുന്നതിലും ഈ പ്രോജക്റ്റ് നിർണ്ണായക നാഴികക്കല്ലാകും.

എല്ലാത്തരം ജയ് വാൻ കാർഡുകളും പോയിന്റ് ഓഫ് സെയിൽ (PoS) ടെർമിനലുകൾ, ഇ-കൊമേഴ്‌സ് പ്ലാറ്റ്‌ഫോമുകൾ, എ.ടി.എമ്മുകൾ, ഡിജിറ്റൽ വാലറ്റുകൾ എന്നിവയിൽ ലഭ്യമാകും:

• വിവിധ സേവനങ്ങൾ: ടാപ്പ് ആൻഡ് ഗോ പേയ്‌മെന്റുകൾ, ഓൺലൈൻ പർച്ചേസുകൾ, എ.ടി.എം വഴിയുള്ള പണം പിൻവലിക്കൽ എന്നിവയ്ക്ക് കാർഡ് ഉപയോഗിക്കാം.
• രാജ്യാന്തര ഉപയോഗം: നിർദ്ദിഷ്ട നിയമചട്ടങ്ങൾക്ക് വിധേയമായി പ്രാദേശിക, അന്താരാഷ്ട്ര പേയ്‌മെന്റുകൾക്കും ഉപഭോക്താക്കൾക്ക് ഈ കാർഡ് സുരക്ഷിതമായി ഉപയോഗിക്കാനാകും.

യാത്ര, ഷോപ്പിംഗ്, വിനോദം, ലൈഫ് സ്റ്റൈൽ തുടങ്ങിയ മേഖലകളിലെ വിവിധ പങ്കാളികൾ വഴി വൻ ഓഫറുകളും സവിശേഷ ആനുകൂല്യങ്ങളും ജയ് വാൻ കാർഡ് ഉടമകൾക്ക് ലഭിക്കുമെന്നും അധികൃതർ വ്യക്തമാക്കി. യു.എ.ഇ സെൻട്രൽ ബാങ്ക് ഗവർണർ ഉൾപ്പെടെയുള്ള ഉന്നത ഉദ്യോഗസ്ഥരുമായി ശൈഖ് മൻസൂർ ബിൻ സായിദ് നടത്തിയ കൂടിക്കാഴ്ചയിലാണ് ഔദ്യോഗിക ലോഞ്ച് പ്രഖ്യാപനമുണ്ടായത്.