റഷ്യ നടത്തിയ വ്യാപകമായ ആകാശ ആക്രമണം പ്രതിരോധിക്കുന്നതിനിടയിൽ യുക്രൈനിന്റെ എഫ്-16 യുദ്ധവിമാനം തകർന്നു വീണു. യുഎസ് നിർമിത എഫ്-16 യുദ്ധവിമാനമാണ് റഷ്യൻ ആക്രമണത്തിൽ തകർന്നു വീണത്. അപകടത്തിൽ പൈലറ്റ് കൊല്ലപ്പെട്ടു.

477 ഡ്രോണുകളും 60 മിസൈലുകളുമടക്കം യുക്രൈനിൽ വ്യാപക ആക്രമണമാണ് റഷ്യ നടത്തിയത്. ഡ്രോണുകളിൽ ഭൂരിഭാഗവും യുക്രൈൻ പ്രതിരോധ സംവിധാനങ്ങൾ തകർത്തെങ്കിലും റഷ്യ അയച്ച മിസൈലുകളിൽ ഭൂരിഭാഗവും ലക്ഷ്യം കണ്ടു.

ഈ ആക്രമണത്തെ പ്രതിരോധിക്കുന്നതിനിടെയാണ് യുക്രൈനിന്റെ എഫ്-16 യുദ്ധവിമാനം തകർന്നതെന്ന് യുക്രൈൻ അറിയിച്ചു. യുദ്ധത്തിനിടെ ഇത് മൂന്നാമത്തെ തവണയാണ് എഫ്-16 യുദ്ധവിമാനം തകരുന്നത്. യുദ്ധം ആരംഭിച്ചതിന് ശേഷം റഷ്യയിൽ നിന്ന് യുക്രൈൻ നേരിടുന്ന ഏറ്റവും വലിയ ആക്രമണമായിരുന്നു ശനിയാഴ്ച രാത്രി നടന്നത്.

യുക്രൈൻ പ്രവിശ്യകളായ ലവിവ്, പൊൾടാവ, മൈകൊളവിവ്, ഡിനിപ്രൊപെട്രോവ്‌സ്, ചെർകാസി തുടങ്ങിയ ഇടങ്ങളിലാണ് ആക്രമണം നടന്നത്. റഷ്യൻ മിസൈലിനെ തകർക്കാൻ ശ്രമിക്കുന്നതിനിടെയാണ് എഫ്-16 യുദ്ധവിമാനത്തിന് സാരമായി തകരാർ സംഭവിക്കുന്നത്. വിമാനം ജനവാസമേഖലയിൽ ഇടിക്കാതിരിക്കാൻ പൈലറ്റ് ശ്രമിക്കുന്നതിനിടയിലാണ് പൈലറ്റിന് ജീവഹാനി സംഭവിച്ചത്.
പൈലറ്റിന്റെ ജീവത്യാഗം രാജ്യത്തിന് വലിയ നഷ്ടമാണ് എന്നും റഷ്യൻ ആക്രമണത്തിനെതിരെ കൂടുതൽ ശക്തമായി പ്രതിരോധം ഏർപ്പെടുത്തുമെന്നും യുക്രൈൻ അധികൃതർ അറിയിച്ചു.