പ്രമുഖ മാധ്യമ സ്ഥാപനങ്ങളായ സിഎൻഎൻ (CNN), എംഎസ് നൗ (MS NOW), പൊളിറ്റിക്കോ (Politico) എന്നിവയ്ക്ക് വൈറ്റ് ഹൗസിൽ ഏർപ്പെടുത്തിയ പ്രവേശന വിലക്ക് താൽക്കാലികമായി നീക്കാൻ യുഎസ് ഫെഡറൽ ജഡ്ജി ഉത്തരവിട്ടു. ഈ മൂന്ന് മാധ്യമ സ്ഥാപനങ്ങൾക്കുമേൽ പ്രസിഡന്റ് ഡോണൾഡ് ട്രംപ് ഏർപ്പെടുത്തിയ വിലക്ക് ഭരണഘടനാ വിരുദ്ധമാകാൻ സാധ്യതയുണ്ടെന്ന് വ്യക്തമാക്കിയാണ് കോടതിയുടെ വിധി. മാധ്യമങ്ങളുമായുള്ള പോരാട്ടങ്ങളിൽ ട്രംപിന് നേരിടേണ്ടി വന്ന പ്രധാന തിരിച്ചടിയാണിത്.

സെപ്റ്റംബർ 18-ന് ട്രംപ് പ്രഖ്യാപിച്ച വിലക്കിനെതിരെ മാധ്യമ സ്ഥാപനങ്ങൾ നൽകിയ ഹർജിയിലാണ് യുഎസ് ഡിസ്ട്രിക്റ്റ് ജഡ്ജി ടിം കെല്ലി ഇടക്കാല ഉത്തരവ് പുറപ്പെടുവിച്ചത്. മാധ്യമപ്രവർത്തകരുടെ പ്രസ് പാസുകൾ ഉടനടി തിരികെ നൽകാനും, അടുത്ത 14 ദിവസത്തേക്ക് വിലക്ക് നടപ്പിലാക്കുന്നതിൽ നിന്ന് ഉദ്യോഗസ്ഥരെ തടയാനും ജഡ്ജി നിർദ്ദേശിച്ചു.

ദേശീയ സുരക്ഷാ കാരണങ്ങളാലാണ് വിലക്ക് ഏർപ്പെടുത്തിയതെന്ന സർക്കാരിന്റെ വാദം തള്ളിയ ജഡ്ജി, നിഷേധാത്മകമായ വാർത്തകളും വ്യാജ റിപ്പോർട്ടുകളുമാണ് വിലക്കിന് കാരണമെന്ന് ട്രംപ് തന്നെ വ്യക്തമാക്കിയത് ചൂണ്ടിക്കാട്ടി. മുൻകൂട്ടി അറിയിപ്പുകളോ വിശദീകരണം നൽകാനുള്ള അവസരമോ നൽകാതെ മാധ്യമപ്രവർത്തകരുടെ പാസുകൾ റദ്ദാക്കിയത് ഭരണഘടന ഉറപ്പുനൽകുന്ന അഭിപ്രായ സ്വാതന്ത്ര്യത്തിന്റെയും സ്വാഭാവിക നീതിയുടെയും ലംഘനമാണെന്ന് മാധ്യമങ്ങളുടെ അഭിഭാഷകർ വാദിച്ചിരുന്നു.