ദുബായിൽ പ്രവാസികൾ ഉൾപ്പെടെയുള്ളവരുടെ മരണാനന്തര നടപടികൾ വേഗത്തിലാക്കാനും ലളിതമാക്കാനും ലക്ഷ്യമിട്ട് ദുബായ് ഹെൽത്ത് അതോറിറ്റി (DHA) 'ജാബർ' (Jabr) എന്ന ഏകീകൃത ഡിജിറ്റൽ സംവിധാനത്തിന് തുടക്കം കുറിച്ചു. മരണപ്പെട്ടവരുടെ ബന്ധുക്കൾക്ക് രേഖകൾ ശരിയാക്കാൻ വിവിധ സർക്കാർ ഓഫീസുകൾ കയറി ഇറങ്ങേണ്ട സാഹചര്യം ഒഴിവാക്കുക എന്നതാണ് ഈ സംവിധാനത്തിന്റെ പ്രധാന ലക്ഷ്യം.

മരണം സ്ഥിരീകരിച്ചു കഴിഞ്ഞാൽ ഉടൻ തന്നെ ഈ പുതിയ പ്ലാറ്റ്‌ഫോമിൽ മരണസർട്ടിഫിക്കറ്റ് ഓട്ടോമാറ്റിക്കായി ഇഷ്യൂ ചെയ്യുകയും, ഇതുമായി ബന്ധപ്പെട്ട 22 സർക്കാർ വകുപ്പുകളിലേക്ക് നോട്ടിഫിക്കേഷൻ അയക്കുകയും ചെയ്യും. മരിച്ചവരുടെ കുടുംബത്തിനായി പ്രത്യേകമായി ഒരു സർക്കാർ ഓഫീസറെ സേവനത്തിനായി നിയോഗിക്കും.

കൂടാതെ, മയ്യത്ത് പരിപാലനം, ഖബറടക്കം തുടങ്ങിയ ചടങ്ങുകൾക്കായി 130-ൽ അധികം സന്നദ്ധപ്രവർത്തകരുടെയും, മാതാപിതാക്കളുടെ വിയോഗത്തിൽ കുട്ടികൾക്ക് കൈത്താങ്ങാകാൻ 230 സ്കൂൾ കൗൺസിലർമാരുടെയും സേവനം ഈ സംവിധാനത്തിലൂടെ ലഭ്യമാക്കും. ബന്ധുക്കൾക്ക് അനുശോചനം അറിയിക്കാനും ഒത്തുചേരാനുമായി 70 സ്ഥലങ്ങളിൽ പ്രത്യേക ടെന്റുകളും സജ്ജമാക്കും. പ്രവാസികളുടെ മൃതദേഹങ്ങൾ നാട്ടിലേക്ക് അയക്കുന്ന നടപടികൾ വേഗത്തിലാക്കാനും ഈ സംവിധാനം സഹായകമാകുമെന്നാണ് അധികൃതരുടെ വിലയിരുത്തൽ.