യുഎഇയിൽ തുടരുന്ന അസ്ഥിര കാലാവസ്ഥയുടെ പശ്ചാത്തലത്തിൽ തൊഴിലാളികളുടെ സുരക്ഷ വർദ്ധിപ്പിക്കാൻ സ്വകാര്യ മേഖലയിലെ സ്ഥാപനങ്ങൾക്ക് അധികൃതർ നിർദ്ദേശം നൽകി. വരും ദിവസങ്ങളിൽ മോശം കാലാവസ്ഥ തുടരാൻ സാധ്യതയുള്ളതിനാൽ എല്ലാ എമിറേറ്റുകളിലെയും തൊഴിലിടങ്ങളിൽ മുൻകരുതൽ നടപടികൾ കർശനമാക്കണമെന്ന് യുഎഇ ആവശ്യപ്പെട്ടു.

ജോലി സമയത്തും ജോലിസ്ഥലത്തേക്കും തിരിച്ചുമുള്ള യാത്രകളിലും തൊഴിലാളികളുടെ സുരക്ഷ ഉറപ്പാക്കാൻ ആവശ്യമായ പ്രതിരോധ നടപടികൾ തൊഴിലുടമകൾ സ്വീകരിക്കണമെന്ന് നിർദ്ദേശമുണ്ട്. തൊഴിലാളികളുടെ സുരക്ഷയ്ക്കാണ് പ്രഥമ പരിഗണന നൽകേണ്ടതെന്ന് മാനവ വിഭവശേഷി സ്വദേശിവൽക്കരണ മന്ത്രാലയം (MoHRE) ഊന്നിപ്പറഞ്ഞു. സുരക്ഷിതമായ തൊഴിൽ അന്തരീക്ഷം നിലനിർത്തുന്നതിനും ബിസിനസ്സ് തടസ്സമില്ലാതെ മുന്നോട്ട് കൊണ്ടുപോകുന്നതിനും തൊഴിൽപരമായ ആരോഗ്യ-സുരക്ഷാ മാനദണ്ഡങ്ങൾ പാലിക്കുന്നത് അനിവാര്യമാണെന്നും മന്ത്രാലയം വ്യക്തമാക്കി.

അസ്ഥിര കാലാവസ്ഥയിൽ നിർമ്മാണ മേഖലയിലോ പുറത്തോ ജോലി ചെയ്യുന്നവർക്ക് പ്രത്യേക ജാഗ്രതാ നിർദ്ദേശങ്ങൾ നൽകിയിട്ടുണ്ട്. ഇന്ന് മാർച്ച് 23 തിങ്കളാഴ്ച രാജ്യത്തിന്റെ വിവിധ ഭാഗങ്ങളിൽ ശക്തമായ മഴ തുടരുന്ന സാഹചര്യത്തിൽ, മന്ത്രാലയത്തിന്റെ ഈ അറിയിപ്പ് സ്വകാര്യ സ്ഥാപനങ്ങൾ ഗൗരവത്തോടെ കാണണമെന്നും വീഴ്ച വരുത്തുന്നവർക്കെതിരെ നടപടിയുണ്ടാകുമെന്നും അധികൃതർ സൂചിപ്പിച്ചു.