ജമ്മു കശ്മീരിലെ പ്രശസ്ത വിനോദസഞ്ചാര കേന്ദ്രമായ ഗുൽമാർഗിൽ കേബിൾ കാർ (ഗൊണ്ടോള) സർവീസിൽ കുടുങ്ങിയ മുന്നൂറോളം വിനോദസഞ്ചാരികളെയും സുരക്ഷിതമായി രക്ഷപ്പെടുത്തി. മോശം കാലാവസ്ഥയെത്തുടർന്ന് കേബിൾ കാർ സംവിധാനത്തിൽ പെട്ടെന്നുണ്ടായ സാങ്കേതിക തകരാറാണ് പ്രതിസന്ധി സൃഷ്ടിച്ചത്. തുടർന്ന് മണിക്കൂറുകൾ നീണ്ട വൻ രക്ഷാദൗത്യത്തിനൊടുവിൽ രാത്രി ഏഴരയോടെയാണ് മുഴുവൻ സഞ്ചാരികളെയും താഴെയെത്തിക്കാനായത്.

മേഖലയിൽ പെട്ടെന്ന് കാലാവസ്ഥ മോശമായതോടെ ആകെ 65 കേബിൾ കാർ കാബിനുകളാണ് വായുവിൽ കുടുങ്ങിപ്പോയത്. ഇതോടെ വ്യോമസേനയുടെയും കരസേനയുടെയും പ്രത്യേക സംഘങ്ങൾ അടിയന്തരമായി രക്ഷാപ്രവർത്തനത്തിന് ഇറങ്ങുകയായിരുന്നു. ജമ്മു കശ്മീർ പോലീസും സംസ്ഥാന-കേന്ദ്ര ദുരന്തനിവാരണ സേനകളും (SDRF & NDRF) സംയുക്തമായാണ് ദൗത്യം പൂർത്തിയാക്കിയത്.

ശക്തമായ കാറ്റും മോശം കാലാവസ്ഥയും കാരണം രക്ഷാദൗത്യം വലിയ വെല്ലുവിളിയാണ് ഉയർത്തിയത്. എങ്കിലും ആർക്കും പരിക്കുകളില്ലാതെ എല്ലാവരെയും സുരക്ഷിത താവളങ്ങളിലേക്ക് മാറ്റാൻ കഴിഞ്ഞതായി കരസേനയും ജമ്മു കശ്മീർ പോലീസും ഔദ്യോഗികമായി അറിയിച്ചു. നിലവിൽ ആശങ്കപ്പെടേണ്ട സാഹചര്യമില്ലെന്നും അധികൃതർ വ്യക്തമാക്കി.