കേരള കോൺഗ്രസിന്റെ ജോസഫ് വിഭാഗത്തിൽനിന്നുള്ള മുതിർന്ന നേതാവും അഭിഭാഷകനുമായ അഡ്വ. മോഹൻ ജോർജ് ഔദ്യോഗികമായി ബിജെപിയിൽ ചേർന്നു. നിലമ്പൂർ ഉപതിരഞ്ഞെടുപ്പ് ബിജെപി സ്ഥാനാർത്ഥിയാണ് അദ്ദേഹം.

മലയോര കുടിയേറ്റ ക്രിസ്ത്യൻ വിഭാഗത്തിന്റെ പ്രതിനിധിയായി ബിജെപി മോഹൻ ജോർജിനെ സ്ഥാനാർത്ഥിയാക്കിയത്.ചുങ്കത്തറ സ്വദേശിയായ മോഹൻ ജോർജ് നാല്പത് വർഷത്തിലധികമായി കേരള കോൺഗ്രസ് മാണി, ബാലകൃഷ്ണപിള്ള, ജോസഫ് വിഭാഗങ്ങളിലായി സജീവമായിരുന്ന രാഷ്ട്രീയ പ്രവർത്തകനാണ്. ഇപ്പോൾ നിലമ്പൂർ കോടതിയിൽ അഭിഭാഷകനായും പ്രവർത്തിക്കുന്നു.

നിലമ്പൂരിൽ ശക്തമായ മത്സരമുണ്ടാകുമെന്നും ജനങ്ങൾ മാറി ചിന്തിക്കുമെന്നും ബിജെപി സ്ഥാനാർത്ഥി മോഹൻ ജോർജ് പ്രതികരിച്ചു. നേരത്തെ കേരള കോൺഗ്രസ് ജോസഫ് വിഭാഗം സംസ്ഥാന കമ്മിറ്റി അംഗമായിരുന്നു. ബിജെപി സംസ്ഥാന നേതാക്കൾ നേരിട്ട് ബന്ധപ്പെട്ടു. ബിജെപിയ്ക്ക് മണ്ഡലത്തിൽ വലിയ സാധ്യതയുണ്ട്. എല്ലാ വിഭാഗം ആളുകളുടെയു വോട്ട് പ്രതീക്ഷിക്കുന്നുവെന്നും അദ്ദേഹം വ്യക്തമാക്കി

ഇതിനൊപ്പം, കേരള കോൺഗ്രസ് ജോസഫ് വിഭാഗത്തിന്റെ ജില്ലാ സെക്രട്ടറിയായ ഷാജു ചെറിയനും ബിജെപിയിൽ ചേർന്നു. ഇരുവരുടെയും ചേർച്ചയോടെ മണ്ഡലത്തിലെ ക്രൈസ്തവ വോട്ടുകൾ ലക്ഷ്യമിട്ടുള്ള ബിജെപിയുടെ ശ്രമങ്ങൾ കൂടുതൽ ശക്തിപ്പെടുത്തുകയാണ്.