ബിജെപിയുടെ ഔദ്യോഗിക ഫേസ്ബുക്ക് പേജിൽ പ്രസിദ്ധീകരിച്ച വിവാദ പോസ്റ്റിനെതിരെ സംസ്ഥാന ഡിജിപിക്ക് പരാതി. ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖറിനെതിരെ യൂത്ത് കോൺഗ്രസ് സംസ്ഥാന വൈസ് പ്രസിഡന്റ് വിഷ്ണു സുനിലാണ് പരാതി നൽകിയത്. കേരളത്തിലെ ജനങ്ങൾക്കിടയിൽ വർഗീയസ്പർദ്ധയും ചേരിതിരിവും ഉണ്ടാക്കുക എന്ന ഗൂഢലക്ഷ്യത്തോടെയാണ് ഈ പോസ്റ്റ് പങ്കുവെച്ചതെന്ന് പരാതിയിൽ ആരോപിക്കുന്നു.

ബിജെപി പേജിൽ വന്ന ചിത്രത്തിലൂടെ കോൺഗ്രസ് അധ്യക്ഷൻ മല്ലികാർജുൻ ഖാർഗെ, ലോക്സഭാ പ്രതിപക്ഷ നേതാവ് രാഹുൽ ഗാന്ധി എന്നിവരെ അപമാനിക്കാനും വ്യക്തിഹത്യ നടത്താനും ശ്രമിച്ചുവെന്നാണ് പരാതിയുടെ പ്രധാന ഉള്ളടക്കം. ഈ ചിത്രം ലക്ഷക്കണക്കിന് വരുന്ന കോൺഗ്രസ് പ്രവർത്തകരുടെ അഭിമാനത്തിന് കളങ്കമുണ്ടാക്കുന്നതും വിശ്വാസത്തെ വ്രണപ്പെടുത്തുന്നതുമാണെന്നും വിഷ്ണു സുനിൽ പരാതിയിൽ ചൂണ്ടിക്കാട്ടി.

അടുത്ത കാലത്തായി ബിജെപിയും കോൺഗ്രസും തമ്മിൽ സോഷ്യൽ മീഡിയയിൽ നടക്കുന്ന പോര് ഇത്തരത്തിൽ നിയമപരമായ നടപടികളിലേക്ക് നീങ്ങുന്നത് രാഷ്ട്രീയ കേരളത്തിൽ വലിയ ചർച്ചയാകുകയാണ്. പരാതിയിൽ പോലീസ് ഉന്നതതല അന്വേഷണം ആരംഭിച്ചിട്ടുണ്ട്.