ചേരാനെല്ലൂരിൽ 17-കാരൻ ഓടിച്ച ബെൻസ് കാറിടിച്ച് സ്കൂട്ടർ യാത്രികനായ ജയപാലകൃഷ്ണൻ മരിച്ച സംഭവത്തിൽ ഗുരുതര വീഴ്ച വരുത്തിയ നാല് പോലീസ് ഉദ്യോഗസ്ഥരെ സസ്പെൻഡ് ചെയ്തു. സി.ഐ ശ്യാംകുമാർ, എസ്.എച്ച്.ഒ വിശ്വജിത്ത്, സി.പി.ഒ അരുൺ, എ.എസ്.ഐ മനോജ് എന്നിവർക്കെതിരെയാണ് ആഭ്യന്തര വകുപ്പ് നടപടി സ്വീകരിച്ചത്. അപകടമുണ്ടാക്കിയ അഡീഷണൽ ജഡ്ജിയുടെ മകനെ സ്റ്റേഷൻ ജാമ്യത്തിൽ വിട്ടയച്ചതും കേസ് ലഘൂകരിക്കാൻ ശ്രമിച്ചതും വൻ ജനരോഷത്തിനും നിയമസഭയിൽ പ്രതിപക്ഷ പ്രതിഷേധത്തിനും വഴിതുറന്നിരുന്നു.

ആഭ്യന്തരമന്ത്രി രമേശ് ചെന്നിത്തലയുടെ നിർദ്ദേശപ്രകാരം എ.ഡി.ജി.പി പി. വിജയൻ നേരിട്ടെത്തി ചേരാനല്ലൂർ പോലീസ് സ്റ്റേഷനിലെ സി.സി.ടി.വി ദൃശ്യങ്ങളും റെക്കോർഡുകളും പരിശോധിച്ച ശേഷമാണ് നടപടി പ്രഖ്യാപിച്ചത്. അപകടത്തിൽ മരിച്ച ജയപാലകൃഷ്ണന്റെ വീട് സന്ദർശിച്ച എ.ഡി.ജി.പി, കുടുംബത്തിന് പൂർണ്ണ നീതി ഉറപ്പാക്കുമെന്നും കുറ്റക്കാർ ആരായാലും നിയമപരമായ നടപടിയുണ്ടാകുമെന്നും വ്യക്തമാക്കി. പോലീസിന്റെ വീഴ്ചയിൽ സർക്കാർ വിട്ടുവീഴ്ച ചെയ്യില്ലെന്ന് വ്യക്തമാക്കിയതിന് തൊട്ടുപിന്നാലെയാണ് സസ്പെൻഷൻ ഉത്തരവിറങ്ങിയത്. നിലവിൽ ജില്ലാ ക്രൈംബ്രാഞ്ചാണ് കേസ് അന്വേഷിക്കുന്നത്.