മാമി തിരോധാനക്കേസിൽ നിർണ്ണായക വഴിത്തിരിവ്; തടവിൽ പാർപ്പിക്കാനായി തട്ടിക്കൊണ്ടുപോയതെന്ന് ക്രൈംബ്രാഞ്ച്, പുതിയ എഫ്.ഐ.ആർ രജിസ്റ്റർ ചെയ്തു
കോഴിക്കോട്ടെ പ്രമുഖ റിയൽ എസ്റ്റേറ്റ് വ്യാപാരി മാമി എന്ന മുഹമ്മദ് ആട്ടൂരിന്റെ തിരോധാനക്കേസിൽ നിർണ്ണായക വഴിത്തിരിവ്. മാമിയെ തടവിൽ പാർപ്പിക്കുക എന്ന ലക്ഷ്യത്തോടെ തട്ടിക്കൊണ്ടുപോയതാണെന്ന് ക്രൈംബ്രാഞ്ച് അന്വേഷണത്തിൽ കണ്ടെത്തി. നേരത്തെ സാധാരണ തിരോധാനക്കേസായി അന്വേഷിച്ചിരുന്ന സംഭവത്തിൽ, തട്ടിക്കൊണ്ടുപോകൽ അടക്കമുള്ള ഗുരുതര വകുപ്പുകൾ ഉൾപ്പെടുത്തി ക്രൈംബ്രാഞ്ച് പുതിയ എഫ്.ഐ.ആർ രജിസ്റ്റർ ചെയ്തു.
2023 ഓഗസ്റ്റ് 21-നാണ് കോഴിക്കോട്ടുനിന്ന് മാമിയെ കാണാതായത്. വൈകുന്നേരം വീട്ടിൽ തിരിച്ചെത്തുമെന്ന് പറഞ്ഞ് ഇറങ്ങിയ അദ്ദേഹം പിന്നീട് മടങ്ങിയെത്താത്തതിനെ തുടർന്ന് കുടുംബം പരാതി നൽകുകയായിരുന്നു. കാണാതാകുന്നതിന് തൊട്ടുമുമ്പ് അരയിടത്തുപാലം മുതൽ തലക്കുളത്തൂർ വരെയുള്ള മൊബൈൽ ടവർ ലൊക്കേഷനുകളിൽ മാമി ഉണ്ടായിരുന്നതായി പോലീസ് കണ്ടെത്തിയിരുന്നെങ്കിലും പിന്നീട് എന്ത് സംഭവിച്ചു എന്നതിൽ വ്യക്തതയുണ്ടായിരുന്നില്ല.
ആദ്യം നടക്കാവ് പോലീസും പിന്നീട് പ്രത്യേക അന്വേഷണ സംഘവും കേസ് അന്വേഷിച്ചെങ്കിലും സി.സി.ടി.വി ദൃശ്യങ്ങൾ പരിശോധിക്കുന്നതിലടക്കം തുടക്കത്തിലുണ്ടായ വീഴ്ചകൾ കാരണം തുമ്പൊന്നും ലഭിച്ചിരുന്നില്ല. തുടർന്ന് കേസ് ക്രൈംബ്രാഞ്ചിന് കൈമാറുകയായിരുന്നു. 2026-ൽ പുതിയ സർക്കാർ അധികാരത്തിൽ വന്നതിന് പിന്നാലെ അന്വേഷണ സംഘത്തെ വിപുലീകരിക്കുകയും അന്വേഷണം ഊർജ്ജിതമാക്കുകയും ചെയ്തതോടെയാണ് മാമിയെ തട്ടിക്കൊണ്ടുപോയി തടവിൽ പാർപ്പിച്ചിരിക്കുകയാണെന്ന നിർണ്ണായക തെളിവുകൾ ലഭിച്ചത്.
കേസിൽ വലിയ ദുരൂഹതയുണ്ടെന്നും തട്ടിക്കൊണ്ടുപോകലാണെന്നും മാമിയുടെ കുടുംബം തുടക്കം മുതൽ ആരോപിച്ചിരുന്നു. കുടുംബത്തിന്റെ ആരോപണങ്ങളെ ശരിവെക്കുന്നതാണ് ക്രൈംബ്രാഞ്ചിന്റെ ഇപ്പോഴത്തെ കണ്ടെത്തലുകൾ. കോഴിക്കോട്ടെ പ്രമുഖ റിയൽ എസ്റ്റേറ്റ് ഇടനിലക്കാരനായിരുന്ന മാമിയെ തട്ടിക്കൊണ്ടുപോയതിന് പിന്നിൽ റിയൽ എസ്റ്റേറ്റ് സംഘങ്ങൾ തമ്മിലുള്ള സാമ്പത്തിക തർക്കങ്ങളും വൈരാഗ്യവുമാണെന്ന നിഗമനത്തിലാണ് അന്വേഷണ സംഘം മുന്നോട്ട് പോകുന്നത്.
