ദേശാഭിമാനി പത്രത്തിന്റെ അച്ചടിച്ച വാരാന്തപ്പതിപ്പ് വിതരണം ചെയ്തില്ലെന്ന തരത്തിൽ പ്രചരിക്കുന്ന വാർത്തകൾ പൂർണ്ണമായും തള്ളി റെസിഡന്റ് എഡിറ്റർ എം. സ്വരാജ്. പ്രസ്സിലെ യന്ത്രത്തകരാർ കാരണം വാരാന്തപ്പതിപ്പിന്റെ അച്ചടി സമയത്തിന് പൂർത്തിയാക്കാൻ കഴിയാത്തതാണ് പ്രശ്നങ്ങൾക്ക് കാരണമെന്നും, നിലവിൽ പ്രചരിക്കുന്നതെല്ലാം വസ്തുതാവിരുദ്ധമായ കാര്യങ്ങളാണെന്നും അദ്ദേഹം വിശദീകരിച്ചു.

ദേശാഭിമാനിയുടെ ഒരു പ്രത്യേക യൂണിറ്റിലെ പത്രം അച്ചടിക്കുന്നത് ഒരു സ്വകാര്യ പ്രസ്സിലാണ്. ഈ പ്രസ്സിൽ പെട്ടെന്നുണ്ടായ യന്ത്രത്തകരാർ മൂലം കഴിഞ്ഞ രണ്ട് ദിവസമായി തൊട്ടടുത്ത ജില്ലയിലെ യൂണിറ്റിൽ നിന്നാണ് പത്രം ഒരുമിച്ച് അച്ചടിക്കുന്നത്. ദൂരക്കൂടുതൽ കാരണം സമയബന്ധിതമായി അച്ചടി പൂർത്തിയാക്കാനും വിതരണം ചെയ്യാനും സാങ്കേതിക തടസ്സം നേരിട്ടു. ഈ പശ്ചാത്തലത്തിലാണ് ഞായറാഴ്ചത്തെ വാരാന്തപ്പതിപ്പ് തിങ്കളാഴ്ച വിതരണം ചെയ്യാൻ മാനേജ്മെന്റ് തീരുമാനിച്ചതെന്നും, ഇതാണ് പത്രത്തിൽ 'സാങ്കേതിക പ്രശ്നം' എന്ന പേരിൽ അറിയിപ്പ് നൽകിയതെന്നും അദ്ദേഹം വ്യക്തമാക്കി.

വി.എസ്. അച്യുതാനന്ദൻ അനുസ്മരണമുള്ള വാരാന്തപ്പതിപ്പ് മനഃപൂർവ്വം ഒഴിവാക്കിയതാണെന്ന വാർത്തകൾ അടിസ്ഥാനരഹിതമാണ്. വരാനിരിക്കുന്ന ഇരുപത്തിയൊന്നാം തീയതിയിലെ പത്രത്തിൽ വി.എസ്. അനുസ്മരണവുമായി ബന്ധപ്പെട്ട പ്രത്യേക പേജുകൾ ഉണ്ടായിരിക്കും. നാല് പേജുകളുള്ള ഞായറാഴ്ച പതിപ്പിന്റെ ആദ്യ പേജിലും അവസാന പേജിലും കെ. സുധാകരൻ എഴുതിയ വി.എസ്. അനുസ്മരണ കുറിപ്പാണുള്ളത്. ഇതല്ലാതെ രാഷ്ട്രീയ കാരണങ്ങളാൽ പതിപ്പ് മാറ്റിവെച്ചു എന്ന് പറയുന്നതെല്ലാം തെറ്റായ പ്രചാരണങ്ങളാണ്. അന്തരിച്ച നേതാവിനെ ഇത്തരം വിവാദങ്ങളിലേക്ക് വലിച്ചിഴയ്ക്കുന്നത് ശരിയല്ലെന്നും സ്വരാജ് കൂട്ടിച്ചേർത്തു. സോഷ്യൽ മീഡിയയിൽ പ്രചരിക്കുന്നത് പോലെ 'കള്ളൻ വിജയൻ' എന്ന പേരിലുള്ള യാതൊരു ലേഖനമോ വാർത്തയോ വാരാന്തപ്പതിപ്പിൽ ഉൾപ്പെടുത്തിയിട്ടില്ലെന്നും അദ്ദേഹം വ്യക്തമാക്കി.

എല്ലാ ഞായറാഴ്ചകളിലും ദേശാഭിമാനി പത്രത്തോടൊപ്പം വാരാന്തപ്പതിപ്പ് പുറത്തിറങ്ങാറുണ്ടെങ്കിലും ഇന്നത്തെ പത്രത്തോടൊപ്പം അത് ലഭ്യമാകാത്തതാണ് വിവാദങ്ങൾക്ക് വഴിവെച്ചത്. 'കള്ളൻ വിജയൻ' എന്ന പേരിലുള്ള ഒരു നാടക നിരൂപണം ഉൾപ്പെട്ടതിനാലാണ് അവസാന നിമിഷം വാരാന്തപ്പതിപ്പ് പിൻവലിച്ചതെന്ന തരത്തിൽ രാഷ്ട്രീയ കേന്ദ്രങ്ങളിൽ വലിയ തോതിൽ ഊഹാപോഹങ്ങൾ പ്രചരിച്ചിരുന്നു.