എസ്.എഫ്.ഐ. പ്രവർത്തകനായിരുന്ന ധീരജ് രാജേന്ദ്രനെ കൊലപ്പെടുത്തിയ കേസിലെ ഒന്നാം പ്രതി നിഖിൽ പൈലിയെ ഇടുക്കി ഡി.സി.സി. (DCC) അംഗമാക്കാൻ ശുപാർശ. ഡി.സി.സി. പ്രസിഡന്റ് സി.പി. മാത്യുവാണ് നിഖിൽ പൈലി അടക്കം അഞ്ചുപേരെ ഡി.സി.സി. അംഗത്വത്തിലേക്ക് നാമനിർദ്ദേശം ചെയ്തത്. കെ.പി.സി.സി. സംഘടനാ ജനറൽ സെക്രട്ടറി കൂടി അംഗീകാരം നൽകുന്നതോടെ നിഖിൽ പൈലി ഔദ്യോഗികമായി ഡി.സി.സി. അംഗമാകും.

2022 ജനുവരി 10-നാണ്‌ പൈനാവ് എഞ്ചിനീയറിങ് കോളേജ് വിദ്യാർഥിയായിരുന്ന ധീരജിനെ കെ.എസ്.യു, യൂത്ത് കോൺഗ്രസ് പ്രവർത്തകർ ചേർന്ന് കുത്തിക്കൊലപ്പെടുത്തിയത്‌. കേസിൽ ഒന്നാം പ്രതിയാണെങ്കിലും നിഖിൽ പൈലി നിരപരാധിയാണെന്ന നിലപാടാണ് തുടക്കം മുതൽ കോൺഗ്രസ് ജില്ലാ നേതൃത്വം സ്വീകരിച്ചിരുന്നത്. ജാമ്യത്തിലിറങ്ങിയ നിഖിൽ പൈലിക്ക് പാർട്ടി പരിപാടികളിൽ വലിയ രീതിയിലുള്ള പരിഗണനയും നൽകിയിരുന്നു.

തൊട്ടുപിന്നാലെ, ഡി.സി.സി. അംഗമായി നാമനിർദ്ദേശം ചെയ്തതിൽ നന്ദി അറിയിച്ച് നിഖിൽ പൈലി ഫെയ്സ്ബുക്കിൽ കുറിപ്പ് പങ്കുവെച്ചിട്ടുണ്ട്. കെ.പി.സി.സി. പ്രസിഡന്റ്, മുൻ കെ.പി.സി.സി. പ്രസിഡന്റ് കെ. സുധാകരൻ, ഡി.സി.സി. പ്രസിഡന്റ് സി.പി. മാത്യു എന്നിവർക്കാണ് ഫെയ്സ്ബുക്ക് പോസ്റ്റിലൂടെ അദ്ദേഹം നന്ദി അറിയിച്ചത്. കൊലക്കേസ് പ്രതിക്ക് പാർട്ടിയിൽ ഔദ്യോഗിക പദവി നൽകാനുള്ള കോൺഗ്രസ് നീക്കത്തിനെതിരെ വലിയ രാഷ്ട്രീയ വിവാദങ്ങൾക്ക് സാധ്യതയുണ്ട്.