സി.എം.ആർ.എൽ - എക്‌സാലോജിക് ഇടപാടിൽ അഴിമതി നിരോധന നിയമപ്രകാരം മുൻ മുഖ്യമന്ത്രി പിണറായി വിജയൻ, മുൻ മന്ത്രി പി.എ. മുഹമ്മദ് റിയാസ്, ടി. വീണ എന്നിവർക്കെതിരെ കേസെടുക്കണമെന്ന എൻഫോഴ്സ്മെന്റ് ഡയറക്ടറേറ്റിന്റെ (ED) കത്തിൽ വിജിലൻസ് അന്വേഷണത്തിന് ധാരണ. ഇതുസംബന്ധിച്ച് മുഖ്യമന്ത്രി വി.ഡി. സതീശനും ആഭ്യന്തരമന്ത്രി രമേശ് ചെന്നിത്തലയും ഉന്നതതല ചർച്ച നടത്തി. ആരോപണത്തിൽ കോടികളുടെ കൈക്കൂലി പരാമർശിക്കുന്നതിനാൽ വിഷയം വിജിലൻസിന് കൈമാറുന്നതാണ് ഉചിതമെന്നാണ് സർക്കാരിന്റെ വിലയിരുത്തൽ.

നേരിട്ട് കേസെടുക്കണമോ അതോ പ്രാഥമിക അന്വേഷണത്തിന് ശേഷം തുടർനടപടികളിലേക്ക് കടന്നാൽ മതിയോ എന്ന കാര്യത്തിൽ സർക്കാർ പ്രോസിക്യൂഷൻ ഡയറക്ടർ ജനറലിനോട് (DG) നിയമോപദേശം തേടിയിട്ടുണ്ട്. നിയമോപദേശം ലഭിച്ചയുടൻ അന്വേഷണം സംബന്ധിച്ച ഔദ്യോഗിക പ്രഖ്യാപനമുണ്ടാകും. സി.എം.ആർ.എൽ ഇടപാടിൽ മുഖ്യമന്ത്രിയായിരിക്കെ പിണറായി വിജയൻ മകൾ വീണ വഴി 3.28 കോടി രൂപ കൈക്കൂലി വാങ്ങിയെന്നും, ഈ തുക വിദേശത്തേക്ക് കടത്താൻ പി.എ. മുഹമ്മദ് റിയാസ് നേതൃത്വം നൽകിയെന്നുമാണ് ഇ.ഡിയുടെ കണ്ടെത്തൽ.

അന്വേഷണത്തിനിടെ ലഭിക്കുന്ന അനുബന്ധ കുറ്റകൃത്യങ്ങളുടെ വിവരങ്ങൾ പി.എം.എൽ.എ (PMLA) വകുപ്പ് 66(2) പ്രകാരം സംസ്ഥാന അന്വേഷണ ഏജൻസികൾക്ക് കൈമാറുന്ന നടപടിക്രമത്തിന്റെ ഭാഗമായാണ് ഇ.ഡി കത്തുനൽകിയത്. ഇ.ഡി നൽകിയ വിവരങ്ങളെ പ്രാഥമിക രേഖകളായി കണ്ട് സ്വന്തം നിലയിൽ തെളിവുകളും മൊഴികളും ശേഖരിച്ചാകും സംസ്ഥാന വിജിലൻസ് കേസുമായി മുന്നോട്ടുപോകുക.